भरधाव वाहनाच्या धडकेत जळगावातील दोन दुचाकीस्वारांचा मृत्यू
फागणे गावाजवळ भीषण अपघात
धुळे प्रतिनिधी भरधाव वेगाने येणाऱ्या वाहनाने धडक दिल्याने झालेल्या अपघातामध्ये दुचाकीवरील जळगाव शहरातील दोन सुवर्ण व्यावसायिकांचा मृत्यू झल्याची घटना धुळे–जळगाव महामार्गावर फागणे गावाजवळ गुरुवारी सायंकाळी घडली दीपक मोतीलाल भामरे (वय ४५) आणि पन्नालाल भगवान वर्मा (दोघेही रा. जळगाव) अशी मृतांची नावे आहेत
प्राथमिक माहितीनुसार, जळगाव येथील रहिवाशी असलेले दीपक भामरे आणि पन्नालाल वर्मा हे दोघे एमएच १९ सीई १७१९ क्रमांकाच्या दुचाकीने धुळ्याकडून जळगावच्या दिशेने जात होते. फागणे गावापुढे आले असता एका अज्ञात वाहनाने त्यांच्या दुचाकीला जोरदार धडक दिली. धक्क्याची तीव्रता इतकी होती की दोघांचा यावेळी जागीच मृत्यू झाला.
घटनेची माहिती मिळताच धुळे तालुका पोलिसांनी घटनास्थळी धाव घेत पंचनामा करून मृतदेह भाऊसाहेब हिरे वैद्यकीय महाविद्यालयात शवविच्छेदनासाठी हलवले. अज्ञात वाहनचालकाविरुद्ध गुन्हा दाखल करण्यात आला असून पुढील तपास सुरू आहे.
