अवैधरित्या गुटख्याची वाहतूक करणाऱ्या वाहनावर कारवाई
जळगाव: शहरातून अवैधरित्या गुटखा वाहतूक करणाऱ्या वाहनावर अन्न व औषध प्रशासन आणि शहर पोलिसांनी संयुक्त कारवाई करून १२ लाख ५५ हजार ८२० रुपयांचा प्रतिबंधित गुटखा व ४ लाख रुपयांच्या किमतीचे वाहन जप्त केले आहे. एकूण १६ लाख ५५ हजार ८२० रुपयांचा मुद्देमाल हस्तगत करण्यात आला आहे. ही कारवाई दि. २९ ऑगस्ट रोजी कोंबडी बाजारजवळ करण्यात आली.
शहरातून गुटख्याची वाहतूक होत असल्याची माहिती मिळाल्यानंतर अन्न व औषध प्रशासन विभाग आणि शहर पोलिसांनी बाजार परिसरात सापळा रचून वाहन अडविले. त्यात वेगवेगळ्या प्रकारचा प्रतिबंधित पानमसाला, सुगंधित तंबाखू असा मोठा साठा आढळून आला.
या प्रकरणी अन्न सुरक्षा अधिकारी किशोर साळुंके यांनी शहर पोलिस ठाण्यात फिर्याद दिली असून, त्यानुसार पप्पूकुमार शिवदुलार सहनी (वय २७, रा. गंगासारा, बिहार) आणि सुरेशकुमार कुंदन सहानी (वय २७, रा. नशिराबाद, ता. जळगाव) यांच्याविरुद्ध गुन्हा दाखल करण्यात आला आहे. पुढील तपास शहर पोलिस करत आहेत.
