अमळनेरमध्ये गावठी पिस्तूलसह दोन तरुण जेरबंद ; १.६६ लाखांचा मुद्देमाल जप्त
अमळनेर पंकज शेटे I अमळनेर पोलिसांच्या गुन्हे शोध पथकाने मोठी कारवाई करत अवैध गावठी पिस्तूल आणि जिवंत काडतुसे बाळगणाऱ्या दोघांना अटक केली आहे. या कारवाईत पोलिसांनी १ लाख ६६ हजार रुपयांचा मुद्देमाल जप्त केला आहे.
अमळनेर पोलिस स्टेशनचे पोलीस निरीक्षक दत्तात्रय निकम यांना अमळनेर-चोपडा रस्त्यावर दोन व्यक्ती गावठी पिस्तूल विक्रीसाठी येणार असल्याची गोपनीय माहिती मिळाली. या माहितीच्या आधारे त्यांनी तात्काळ पथकाला सोबत घेऊन आसाराम बापू आश्रमासमोर सापळा लावला.
रात्री १०.३० च्या सुमारास दोन संशयित व्यक्ती पोलिसांना पाहताच पळून जाण्याचा प्रयत्न करू लागले. मात्र, पोलिसांनी त्यांना शिताफीने पकडले. चौकशीत त्यांनी आपली नावे विशाल भैय्या सोनवणे (वय १८, रा. ढेकुसिम, ता. अमळनेर) आणि गोपाल भिमा भिल (वय ३०, रा. सत्रासेन, ता. चोपडा) अशी सांगितली.
दोन पिस्तूल आणि ६ जिवंत काडतुसे जप्त
पोलिसांनी त्यांची झडती घेतली असता, त्यांच्याकडे कोणत्याही प्रकारचा परवाना नसताना दोन गावठी पिस्तूल, सहा जिवंत काडतुसे आणि दोन मोटारसायकली आढळून आल्या.
जप्त केलेल्या मुद्देमालात दोन पिस्तूल (६०,००० रुपये), सहा जिवंत काडतुसे (६,००० रुपये) आणि दोन मोटारसायकली (१,००,००० रुपये) असा एकूण १ लाख ६६ हजार रुपयांचा समावेश आहे.
याप्रकरणी अमळनेर पोलीस स्टेशनमध्ये गुन्हा दाखल करण्यात आला असून, पुढील तपास पोलीस उपनिरीक्षक नामदेव बोरकर करत आहेत. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर आणि उपविभागीय पोलीस अधिकारी विनायक कोते यांच्या मार्गदर्शनाखाली करण्यात आली.
