महा पोलीस न्यूज । चेतन वाणी । राज्याचे उपमुख्यमंत्री आणि राष्ट्रवादी काँग्रेस (अजित पवार) पक्षाचे प्रमुख अजित पवार यांच्या विमानाला अपघात झाला आहे. बारामती विमानतळावर उतरताना या विमानाला अपघात झाला असून अपघातात अजित पवार यांच्यासह ६ जणांचा मृत्यू झाला आहे.
राज्याचे उपमुख्यमंत्री अजित पवार यांच्या विमानाला बारामती विमानतळावर लँडिंग दरम्यान भीषण अपघात झाला. बारामती येथील गोजुबावी परिसरातील धावपट्टीवर उतरत असताना विमानाचे नियंत्रण सुटले आणि ते शेतात कोसळले. या भीषण घटनेत अजित पवार यांच्यासह विमानातील इतर ६ जणांचा मृत्यू झाला आहे.
विमान कोसळल्यानंतर क्षणातच तिथून धुराचे प्रचंड लोट बाहेर पडू लागले. परिसरातील नागरिकांनी तत्काळ घटनास्थळी धाव घेत बचावकार्यास मदत केली. विमानात अजित पवार, त्यांचे सुरक्षारक्षक आणि वैयक्तिक सहाय्यक होते. या सर्वांना तातडीने रुग्णवाहिकेतून बारामतीमधील एका हायटेक रुग्णालयात हलवण्यात आले मात्र तोवर उशीर झाला होता.
नागरी विमान वाहतूक संचालनालय (DGCA) आणि विमानतळ प्राधिकरणाचे पथक घटनास्थळी दाखल झाले असून या प्रकरणाची उच्चस्तरीय चौकशी करण्याचे आदेश देण्यात आले आहेत. विमान जुने होते की देखभालीत काही त्रुटी होत्या, या दिशेने तपास सुरू आहे. दरम्यान, मुख्यमंत्री देवेंद्र फडणवीस, उपमुख्यमंत्री एकनाथ शिंदे देखील पुणे येथे पोहचत आहेत.
या अपघाताची बातमी समजताच बारामतीसह संपूर्ण राज्यभरात हळहळ व्यक्त केली जात आहे. कार्यकर्त्यांनी बारामतीतील रुग्णालयाबाहेर मोठी गर्दी केली असून, शांतता राखण्याचे आवाहन प्रशासनाकडून करण्यात आले आहे.
