ब्रेकिंग : भुसावळ गोळीबार, खून प्रकरणातील ७ संशयित पोलिसांच्या जाळ्यात, ४ गावठी कट्टे, ३ काडतूस हस्तगत

महा पोलीस न्यूज । चेतन वाणी । भुसावळ शहरातील जाम मोहल्ला भागातील आर.के.किताब घरासमोरील डीडी सुपर कोल्ड्रिंक्स आणि चहाच्या दुकानात शुक्रवारी सकाळी साडेसात वाजता गोळीबार करून तेहरीन नासीर शेख याचा खून करण्यात आला होता. जळगाव एलसीबी आणि भुसावळ बाजारपेठ पोलिसांनी ७ संशयितांना ताब्यात घेतले असून त्यांच्याकडून ४ गावठी कट्टे, ३ जिवंत काडतूस, १ रिकामी पुंगळी हस्तगत करण्यात आल्याची माहिती अपर पोलीस अधीक्षक अशोक नखाते यांनी दिली आहे.

पोलीस अधीक्षक कार्यालयात प्रेरणा सभागृहात आयोजित पत्रकार परिषदेत पोलिसांनी सविस्तर माहिती दिली. प्रसंगी भुसावळ उपविभागीय पोलीस अधिकारी कृष्णांत पिंगळे, एलसीबीचे निरीक्षक बबन आव्हाड, भुसावळ बाजारपेठ पोलीस ठाण्याचे निरीक्षक राहुल वाघ आदी उपस्थित होते. शुक्रवारी तेहरीन नासीर शेख (वय-२७, मच्छीवाडा, जाम मोहल्ला, भुसावळ) हा चहा पिण्यासाठी जाम मोहल्ला भागातील आर.के.किताब घरासमोरील डीडी सुपर कोल्ड्रिंक्स आणि चहाच्या दुकानात सकाळी साडेसात वाजता आला होता. दोन दुचाकीवर तोंडाला रूमाल बांधून आलेल्या चार संशयीतांनी गावठी पिस्तुलातून पाच गोळ्या झाडून तेहरीन याचा खून केला होता.

टीम एलसीबीने पकडले पहिले ३ संशयित
खून प्रकरणी तनवीर मजीद पटेल, अनवर पटेल, रमीज पटेल, शेख साहील शेख रशिद, मजीद पटेल, अदनान उर्फ काल्या शेख युनुस सर्व रा.भुसावळ यांचे विरुद्ध भुसावळ बाजारपेठ पोलीस स्टेशनला गुन्हा दाखल करण्यात आला आहे. त्यानंतर गुन्हा दाखल झालेपासून आजपावेतो सदर गुन्ह्यातील आरोपी हे फरार झाले होते. दि.११ रोजी संशयित आरोपी सलमान अब्दुल माजीद पटेल उर्फ रमीज पटेल वय ३२ रा.पटेल कॉलनी खडका रोड भुसावळ याच्यासह दोघांना पोलीस निरीक्षक बबन आव्हाड स्थानिक गुन्हे शाखा जळगाव यांचे मार्गदर्शनाखाली स्था.गु.शाखेचे पोलीस उपनिरीक्षक शरद बागल, हवालदार कमलाकर बागुल, गोपाल गव्हाळे, गजानन देशमुख, संघपाल तायडे, महेश सोमवंशी, सचीन पोळ यांनी बल्लारशाह जि.चंद्रपुर येथुन ताब्यात घेवुन भुसावळ बाजारपेठ पोलीस स्टेशन येथे हजर केले आहे.

मनमाड येथून आवळल्या चौघांच्या मुसक्या
गुन्ह्यातील इतर फरार आरोपी हे मनमाड शहराचे जवळपास असल्याची खात्रीशीर बातमी पोलीस निरीक्षक राहुल टी.वाघ भुसावळ बाजारपेठ पोलीस स्टेशन यांना मिळाल्याने लागलीच त्यांनी भुसावळ बाजारपेठ पोलीस स्टेशनचे दुय्यम अधिकारी व गुन्ह शोध पथकाचे अंमलदार यांचे पथक तयार करुन लागलीच त्यांना ताब्यात घेणेकामी रवाना केले होते. मिळालेल्या माहीतीनुसार नमुद पथक यांनी आरोपी नामे अदनान शेख युनुस वय २९ रा.आगाखान वाडा भुसावळ, शेख साहील शेख रशीद वय २१ धंदा आगाखान वाडा, अब्दुल नबी हनीफ पटेल वय ३१ रा.शेरा चौक मास्टर कॉलनी रा. जळगाव, सनीस नाइन मोहमद आसीफ वय १९ रा. एमआयडिसी एरीया जळगाव अशांना शिताफीने मनमाड परिसरातुन ताब्यात घेतले. चौघांकडून ४ गावठी पिस्तुल, ३ जीवंत काडतूस आणि १ रिकामी पुंगळी हस्तगत केली आहे.

भुसावळच्या पथकात यांचा होता समावेश
संपूर्ण कामगिरी पोलीस अधिक्षक जळगाव महेश्वर रेड्डी, अप्पर पोलीस अधिक्षक, अशोक नखाते, उप विभागीय पोलीस अधिकारी भुसावळ भाग भुसावळ कृष्णात पिंगळे तसेच भुसावळ बाजारपेठ पोलीस स्टेशनचे पोलीस निरीक्षक राहुल वाघ यांचे मार्गदर्शनाखाली सहा.पो.निरी.गणेश धुमाळ, सहा.पो.निरी. अमितकुमार बागुल, पोउपनिरी मंगेश जाधव, पो उपनिरी राजु सांगळे, पो उपनिरी मंगेश बेंडकोळी, हवालदार विजय नेरकर, रमण सुरळकर, उमाकांत पाटील, महेश चौधरी, अनवर शेख, निलेश चौधरी, अतुल पवार, सोपान पाटील, प्रशांत परदेशी, जावेद शहा, भुषण चौधरी, योगेश माळी, हुल वानखेडे, हर्षल महाजन अश्यांनी केली आहे.