महा पोलीस न्यूज | ३ जून २०२४ | सोमवारी सायंकाळी जळगावशहरासह जिल्ह्यात अचानक वादळी वाऱ्यासह मुसळधार पाऊस झाला. खराब हवामानामुळे हैदराबादहून जळगाव येत असलेले विमान इंदौर पाठविण्यात आले. जळगावात परवानगी न मिळाल्याने हा निर्णय घेण्यात आला. घडलेल्या प्रकारामुळे प्रवाशांचे हाल होऊन त्यांना मोठा मनस्ताप सहन करावा लागला.
जळगाव विमानतळावरून ‘फ्लाय९१’ या विमान कंपनीचे विमान गोव्यावरून दुपारी जळगावला आले. जळगाववरून हैदराबाद तर हैदराबादवरून पुन्हा हे विमान रात्री नऊ वाजता जळगावला येणार होते. विमानात ४० प्रवाशी असल्याचा अंदाज आहे. जळगावात सायंकाळी अचानक वादळी वाऱ्यासह मुसळधार पावसाने दणका दिला. विजेचा कडकडाट होत असताना आकाशात देखील ढग दाटून आले होते.
खराब हवामानामुळे जळगावपर्यंत आलेले विमान विमानतळावर उतरण्यास परवानगी न मिळाल्यामुळे इंदोर येथे अहिल्याबाई होळकर विमानतळावर उतरविण्यात आले. घडलेल्या प्रकारामुळे विमानातील प्रवासी तसेच जळगाव विमानतळावर गोव्याला जाणाऱ्या प्रवाशांचे चांगलेच हाल झाले. रात्री १० वाजेच्या सुमारास विमान इंदौर येथे पोहचले.
