महा पोलीस न्यूज । २ एप्रिल २०२४ । जळगाव जिल्ह्यात भाजपला मोठा धक्का बसण्याची तयारी शिवसेना ठाकरे गटाकडून करण्यात आली आहे. भाजपचे विद्यमान खासदार उन्मेष पाटील यांना गळाला लावण्यात शिवसेना ठाकरे गट यशस्वी ठरल्याचे मानले जात असून खा.पाटील खासदार संजय राऊत यांच्या भेटीसाठी मुंबईत दाखल झाले आहेत. दरम्यान, खा.उन्मेष पाटलांसह आणखी दोन मोठ्या चेहऱ्यांचा उद्या जाहीर प्रवेश होणार असल्याची माहिती सूत्रांनी दिली आहे.
जळगाव लोकसभा मतदार संघातील विद्यमान खा.उन्मेष पाटील यांचा पत्ता यंदा कट करण्यात आल्याने ते नाराज असल्याचे म्हटले जात आहे. भाजपतील अंतर्गत गटबाजी आणि खा.पाटील यांचे आ.मंगेश चव्हाण यांच्याशी असलेला कलह यामागे कारणीभूत असल्याचे बोलले जात आहे. काही दिवसापूर्वी उन्मेष पाटील नॉट रीचेबल असल्याने अनेकांच्या भुवया उंचावल्या तर दुसरीकडे संपदा उन्मेष पाटील यांनी मतदार संघात दौरे सुरू केले होते. दरम्यान, उन्मेष पाटील ठाकरे गटात प्रवेश करून खासदारकी लढवणार असल्याच्या चर्चा आहेत. सध्या खा.उन्मेष पाटील मुंबईत दाखल झाले असून संजय राऊतांची भेट घेऊन त्यांच्याशी प्राथमिक चर्चा करणार आहेत.
पुढील वाटचालीबाबत चर्चेनंतर उन्मेष पाटील ठाकरे गटात जाण्याबाबतचा निर्णय पक्का करतील, अशी माहिती समोर येत आहे. दरम्यान, उन्मेष पाटील यांच्यासह पारोळा येथील नगराध्यक्ष करण पवार, पाचोरा येथील भाजप तालुकाध्यक्ष अमोल शिंदे आणि अमळनेर येथील माजी आमदार शिरीष चौधरी हे देखील ठाकरे गटात उद्या बुधवारी प्रवेश करणार आहेत, अशी माहिती सूत्रांनी दिली आहे. एकनाथराव खडसेंच्या सोबत आले नव्हते. तेवढे कार्यकर्ते भाजप सोडून ठाकरे गटात प्रवेश करतील, असे म्हटले जात आहे. आज किंवा उद्या या दोन दिवसात मोठ्या घडामोडी घडणार आहे.
