जळगाव लाचलुचपत प्रतिबंधक विभागाची सलग दुसऱ्या दिवशी कारवाई : कारवाईने महसूल विभागात खळबळ
मुक्ताईनगर प्रतिनिधी :– सातबारा उताऱ्यावर नाव लावण्यासाठी तीन हजाराची लाच मागणाऱ्या कुसुंबातील तलाठ्याला जळगावच्या एसीबीच्या पथकाने. अटक केल्याची घटना ताजी असताना जळगाव एसीबीच्या पथकाने मुक्ताईनगर तालुक्यातील काकोडा येथील तलाठ्याला दोन व्यक्तींसह अटक केली असून यामुळे जिल्ह्यातील महसूल विभागात मोठी खळबळ उडाली आहे.
काकोडा येथील तलाठी प्रशांत प्रल्हाद ढमाळे,अरुण शालीग्राम भोलानकार, संतोष प्रकाश उबरकर, असे अटक केलेल्या आरोपींची नावे आहेत.
सूत्रांनी दिलेली माहिती अशी की जळगाव येथील रहिवासी असलेल्या तक्रारदार यांचे आजोबांच्या नावाने कुऱ्हा शिवारात शेत असून ते 1997 मध्ये मयत झाले होते.
तेव्हा पासुन तक्रारदार यांचे वडील, काका, आत्या व मयत काकांच्या मुलांचे यांचे 7/12 उताऱ्यावर नाव लावणे बाकी होते. त्यासाठी तक्रारदार यांनी मागील 7 ते 8 दिवसापूर्वी कुऱ्हा गावातील तलाठी याची भेट घेतली असता यातील प्रशांत प्रल्हाद ढमाळे, तलाठी, सजा काकोडा ता. मुक्ताईनगर, यांनी तक्रारदार यांना तुम्हाला प्रत्येक वर्षाचे 220 रुपये या प्रमाणे 6000 रुपये शासकीय फी भरावी लागेल, जर तुम्हाला शासकीय फी भरायची नसेल तर मला 5000 रुपये द्यावे लागतील असे सांगितले होते त्या बाबत यातील तक्रारदार यांनी दिनांक 1जानेवारी रोजी लाचलूचपत प्रतिबंधक विभाग जळगांव यांच्याकडे तक्रार दिली होती.
या तक्रारीची पडताळणी केली असता यातील प्रशांत प्रल्हाद ढमाळे, तलाठी, व अरुण शालीग्राम भोलानकार, खाजगी पंटर यांनी तक्रारदार यांचे 7/12 उताऱ्यावर त्याचे वडील, काका, आत्या व मयत काकाच्या मुलाचे नाव लावण्याचे मोबदल्यात 5000लाचेची मागणी केली होती. त्यानंतर 8 जानेवारी रोजी सायंकाळी अरुण शालीग्राम भोलानकार या खाजगी पेंटर च्या सांगण्यावरून संतोष प्रकाश उबरकर याने लाच स्वीकारली. याबाबत मुक्ताईनगर पोलीस स्टेशनला रात्री उशिरापर्यंत गुन्हा दाखल करण्यात आला.
यांनी केली कारवाई
जळगाव पोलीस उपअधीक्षक योगेश ठाकूर यांच्या नेतृत्वात पोलीस निरीक्षक नेत्रा जाधव, दिनेशसिंग पाटील, प्रदीप पोळ, प्रणेश ठाकूर, सचिन चाटे यांच्या पथकाने हा सापळा यशस्वी केला.
