डॉक्टर महिलेशी गैरवर्तन करणाऱ्या निलंबित डॉ. विजय घोलप यांना अटक
जळगाव (प्रतिनिधी): जळगाव महापालिकेचे निलंबित मुख्य वैद्यकीय अधिकारी डॉ. विजय घोलप यांच्यावर सहकारी डॉक्टर महिलेशी गैरवर्तन आणि शरीरसुखाची मागणीचा गंभीर आरोप ठेवण्यात आला आहे. या प्रकरणी रविवारी दुपारी शहर पोलीस स्टेशनच्या पथकाने त्यांना अटक केली असून या पूर्वी महापालिका आयुक्त ज्ञानेश्वर ढेरे यांनी त्यांच्यावर निलंबनाची कारवाई केली होती. . या घटनेमुळे मोठी खळबळ उडाली आहे.
या प्रकरणात ३८ वर्षीय डॉक्टर महिलेनं शहर पोलीस स्टेशनला फिर्याद दाखल केली आहे. फिर्यादीत तिनं सांगितलं की, कर्तव्यावर असताना डॉ. घोलप यांनी तिच्यावर घाणेरडे इशारे केले आणि मनाला लज्जास्पद अशी कृत्ये केली. तसेच, तिच्या इच्छेविरुद्ध शरीरसुखाची मागणी करून विनयभंगाचा प्रयत्न केला. ही घटना महापालिकेच्या शाहू महाराज हॉस्पिटलमधील प्रमुख वैद्यकीय अधिकाऱ्यांच्या कक्षात घडली असल्याचा दावा तिनं केला आहे. फिर्यादीवरून रामानंद नगर पोलीस ठाण्यात गुन्हा दाखल करून डॉ. घोलप यांना अटक करण्यात आली आहे.
डॉक्टर महिलेशी गैरवर्तनाच्या आरोपानंतर महापालिकेनं डॉ. घोलप यांना कारणे दाखवा नोटीस बजावली होती, ज्याला तीन दिवसांत उत्तर मागण्यात आलं होतं. मात्र, आयुक्त ढेरे यांनी थेट निलंबनाचे आदेश काढत त्यांना मोठा दणका दिला. याशिवाय, जन्म-मृत्यू नोंदणी विभागातही डॉ. घोलप यांच्याशी संबंधित एक धक्कादायक प्रकार समोर आला आहे. मुख्यमंत्री कार्य प्रशिक्षण योजनेअंतर्गत नियुक्त एका महिलेच्या जागी तिचा पती कर्तव्य बजावत असल्याचं उघड झालं. या प्रकरणाची गेल्या काही महिन्यांपासून चौकशी सुरू असून, तीन सदस्यीय समितीनं अहवाल सादर केला. विशाखा समितीच्या प्राथमिक अहवालानंतर आयुक्तांनी दोन्ही प्रकरणांची गंभीर दखल घेत डॉ. घोलप यांना दोषी ठरवून निलंबित केलं.
या कारवाईमुळे महापालिका आणि वैद्यकीय क्षेत्रात प्रचंड खळबळ माजली आहे.
