महा पोलीस न्यूज । दि.२२ जुलै २०२५ । कवयित्री बहिणाबाई चौधरी उत्तर महाराष्ट्र विद्यापीठ, जळगाव येथील संगणकशास्त्र प्रशालेच्या सायबर सिक्युरिटी अभ्यासक्रमाच्या विद्यार्थिनींनी, विशाखा शिंदे आणि श्रद्धा अहिरराव यांनी जळगाव शहरात सायबर सुरक्षेबाबत महत्त्वपूर्ण जनजागृती मोहीम राबवली. या विद्यार्थिनींनी जिल्हा पेठ पोलीस स्टेशन आणि भास्कर मार्केट परिसरात सायबर गुन्हे आणि त्यापासून स्वतःचे संरक्षण कसे करावे, याबद्दल सविस्तर मार्गदर्शन केले.
या मोहिमेदरम्यान, विशाखा शिंदे आणि श्रद्धा अहिरराव यांनी सायबर गुन्हेगारीची विविध उदाहरणे देऊन उपस्थित पोलीस कर्मचारी, अधिकारी आणि सर्वसामान्य जनतेला सायबर धोक्यांची जाणीव करून दिली. त्यांनी फिशिंग, ऑनलाईन फसवणूक, डेटा चोरी यांसारख्या सामान्य सायबर गुन्ह्यांपासून स्वतःला सुरक्षित ठेवण्यासाठी आवश्यक उपाययोजनांची माहिती दिली. यामध्ये मजबूत पासवर्ड वापरणे, अनोळखी लिंक्सवर क्लिक न करणे, सॉफ्टवेअर अपडेटेड ठेवणे आणि आपली वैयक्तिक माहिती काळजीपूर्वक हाताळणे यासारख्या बाबींवर भर देण्यात आला.
जिल्हा पेठ पोलीस स्टेशन येथे उपस्थित कर्मचारी आणि अधिकाऱ्यांनी या माहितीचे स्वागत केले. त्यांनी सायबर सुरक्षेशी संबंधित आपल्या शंकांचे निरसन करून घेतले आणि या महत्त्वपूर्ण माहितीबद्दल विद्यार्थिनींचे आभार मानले. त्याचप्रमाणे, भास्कर मार्केट परिसरातील नागरिकांनीही या जनजागृतीपर उद्बोधनाचा लाभ घेतला आणि सायबर गुन्हेगारीपासून वाचण्यासाठी उपयुक्त टिप्स जाणून घेतल्या.
कवयित्री बहिणाबाई चौधरी उत्तर महाराष्ट्र विद्यापीठाने आपल्या विद्यार्थ्यांना समाजात उपयुक्त योगदान देण्यासाठी प्रोत्साहन दिले असून, या प्रकारच्या जनजागृती मोहिमांमुळे सायबर साक्षरता वाढण्यास निश्चितच मदत होईल, अशी अपेक्षा व्यक्त केली जात आहे.
