मुकुंद नगरातील घरफोडी उघडकीस, ६१ हजारांचा ऐवज हस्तगत; दोघे संशयित अटकेत
जळगाव – शहरातील मुकुंद नगर भागात पुण्याला गेलेल्या एका नागरिकाच्या बंद घराचे दरवाजे आणि खिडक्यांचे आसारी वाकवून चोरट्यांनी घरात घुसून देवघरातील चांदीचे मुकुट, मूर्ती व अन्य साहित्य असा एकूण ६१ हजार ५०० रुपयांचा ऐवज लंपास केल्याची घटना उघडकीस आली होती. याप्रकरणी दाखल गुन्ह्याचा तपास करत एमआयडीसी पोलिसांनी अवघ्या ४८ तासांत दोन संशयित चोरट्यांना अटक करून चोरलेला संपूर्ण मुद्देमाल हस्तगत केला आहे.
मुकुंद नगर, लाठी शाळेच्या मागे राहणारे अरुण लक्ष्मण शेटे (वय ६४) हे दि. २७ जून रोजी पुण्याला मुलाकडे गेले होते. दि. ११ जुलै रोजी ते जळगावला परत येत असताना शेजाऱ्यांनी त्यांच्या घराचा दरवाजा आणि खिडकीच्या ग्रील वाकवलेल्या अवस्थेत असल्याचे त्यांना कळवले. घरी आल्यानंतर त्यांनी घराची पाहणी केली असता, फर्निचरच्या कपाटात ठेवलेले महादेवाच्या पिंडीवरील चांदीचे मुकुट, देवघरातील अन्य चांदीच्या मूर्ती आणि साहित्य असा एकूण ६१ हजार ५०० रुपयांचा ऐवज चोरीला गेल्याचे त्यांच्या लक्षात आले. त्यांनी याबाबत एमआयडीसी पोलीस ठाण्यात तक्रार दाखल केली होती.
या गुन्ह्याचा तपास पोलीस निरीक्षक बबन आव्हाड यांच्या मार्गदर्शनाखाली उपनिरीक्षक चंद्रकांत धनके, सहाय्यक फौजदार प्रदीप चौधरी, गिरीश पाटील, रतन गिते, गणेश ठाकरे, नितीन ठाकूर आणि राहुल घेटे यांच्या पथकाने सुरू केला. पथकाने परिसरातील सीसीटीव्ही फुटेज तपासले असता दोन संशयित तरुण फुटेजमध्ये कैद झाल्याचे निदर्शनास आले. त्यानुसार शाकीब शेख ताजुद्दीन शेख (वय २४, रा. कासमवाडी) व राहुल शेख रावळकर (वय ३२, रा. जाखनीनगर) या दोघांना पोलिसांनी ताब्यात घेतले.
पोलिसी खाक्या दाखवताच त्यांनी घरफोडी करून चोरी केल्याची कबुली दिली. त्यांच्याकडून महादेवाच्या पिंडीवरील चांदीचे मुकुट, देवघरातील चांदीच्या मूर्ती आणि इतर साहित्य असा संपूर्ण मुद्देमाल जप्त करण्यात आला. दोघांविरोधात एमआयडीसी पोलीस ठाण्यात गुन्हा दाखल करण्यात आला असून, त्यांना न्यायालयात हजर केले जाणार आहे. गुन्ह्यात आणखी कोणी सहभागी आहे का, याचा तपास सुरु असल्याचे पोलिसांनी सांगितले.
