महा पोलीस न्यूज । चेतन वाणी । जळगाव शहराजवळील पाळधी ते तरसोद दरम्यानच्या नवीन राष्ट्रीय महामार्गावर बुधवार, २७ ऑगस्ट २०२५ रोजी दुपारी साडेचार वाजता दोन मालवाहू ट्रकच्या समोरासमोर धडकेमुळे भीषण अपघात झाला. या दुर्घटनेत दोन ट्रकचालकांचा मृत्यू झाला, तर दोन जण गंभीर जखमी झाले. अपघात इतका भीषण होता की, बचावकार्यासाठी जेसीबी आणि क्रेनचा वापर करावा लागला.
मिळालेल्या माहितीनुसार, एका ट्रकमध्ये (क्रमांक जीजे १६ एवाय ००७८) दगडी कोळसा भरलेला होता, तर दुसऱ्या ट्रकमध्ये (क्रमांक एपी ३९ यूएफ ३५९९) बांधकामासाठी लागणाऱ्या टाइल्स होत्या. कचरा फॅक्टरीजवळ दोन्ही ट्रक एकमेकांवर जोरदार धडकले, ज्यामुळे कोळशाने भरलेला ट्रक उलटला.
टाइल्सच्या ट्रकचा चालक जागीच मृत्युमुखी पडला, तर त्याच्यासोबतचा क्लिनर उडी मारून बचावला, पण त्याला किरकोळ दुखापत झाली. कोळशाच्या ट्रकचा चालक गंभीर जखमी होऊन रुग्णालयात दाखल करताना मृत्यू पावला, आणि त्याचा क्लिनरही गंभीर जखमी आहे. दोन्ही ट्रकचा पुढील भाग पूर्णपणे उद्ध्वस्त झाला. मृत चालकाचा मृतदेह केबिनमध्ये अडकल्याने बाहेर काढण्यासाठी जेसीबी आणि क्रेनचा वापर करावा लागला.
अपघाताची माहिती मिळताच स्थानिक नागरिक आणि जळगाव तालुका तसेच महामार्ग पोलिसांनी घटनास्थळी धाव घेतली. जखमींना तातडीने रुग्णालयात हलवण्यात आले. या अपघातामुळे महामार्गावरील वाहतूक काही काळ विस्कळीत झाली, परंतु पोलिसांनी ती पूर्ववत केली.
पहा संपूर्ण व्हिडिओ :
