🎭 जळगावात आजपासून ‘जल्लोष लोककलेचा’ महोत्सव

बालरंगभूमी परिषदेच्या अध्यक्ष निलम शिर्के सामंत यांची उपस्थिती

Chetan WaniNovember 27, 2025

0 1 minute read

महा पोलीस न्यूज । चेतन वाणी । महाराष्ट्राची समृद्ध संस्कृती आणि लोकपरंपरांची महती बालकांपर्यंत पोहोचावी, या उद्देशाने बालरंगभूमी परिषदेतर्फे दरवर्षी आयोजित होणाऱ्या ‘जल्लोष लोककलेचा’ या महोत्सवाला आज (दि. २८ नोव्हेंबर) जळगाव शहरात सुरुवात होत आहे. बालरंगभूमी परिषद, जळगाव शाखेच्या वतीने हा दोन दिवसीय महोत्सव (दि. २८ व २९ नोव्हेंबर) ला. ना. सार्वजनिक विद्यालयाच्या भैय्यासाहेब गंधे सभागृहात आयोजित करण्यात आला आहे. या महोत्सवाच्या उद्‌घाटन सोहळ्याला आज सायंकाळी ५ वाजता बालरंगभूमी परिषदेच्या मध्यवर्ती अध्यक्ष, अभिनेत्री ॲड. निलम शिर्के सामंत यांची प्रमुख उपस्थिती असणार आहे.

बालकलावंतांचा सर्वांगीण कलात्मक विकास साधण्यासाठी आणि त्यांना लोककलांची माहिती व्हावी यासाठी या महोत्सवात विविध स्पर्धात्मक कार्यक्रमांचे आयोजन करण्यात आले आहे. यात समूह लोकनृत्य, समूह लोकगीत गायनासोबतच एकल लोकनृत्य, एकल लोकगीत गायन आणि एकल लोकवाद्य वादनाचे सादरीकरण होणार आहे.

२९ नोव्हेंबर रोजी विविध स्पर्धा
आज (२८ नोव्हेंबर) उद्‌घाटन सोहळ्यानंतर लगेचच समूह लोकनृत्य स्पर्धा पार पडणार आहे, ज्यात २१ संघांचा सहभाग आहे. महोत्सवाच्या दुसऱ्या दिवशी, २९ नोव्हेंबर रोजी दुपारी १ वाजेपासून एकल लोकवाद्य वादन, एकल लोकगीत गायन आणि एकल लोकनृत्य या स्पर्धा होतील. या एकल प्रकारांमध्ये तब्बल ६५ बालकलावंत आपली कला सादर करणार आहेत. त्यानंतर समूह लोकगीत गायन स्पर्धा संपन्न होईल आणि लगेचच पारितोषिक वितरण सोहळा आयोजित करण्यात आला आहे.

आकर्षक बक्षिसे

सर्व सहभागी बालकलावंतांना सहभाग प्रमाणपत्र देण्यात येणार आहे. विजेत्यांसाठी समूह प्रकारात सर्वोत्कृष्ट ४ हजार रुपयांपासून ते प्रशंसनीय १ हजार रुपयांपर्यंत आणि एकल प्रकारात सर्वोत्कृष्ट २ हजार रुपयांपासून ते ५०० रुपयांपर्यंत रोख पारितोषिके, सन्मानचिन्ह व प्रमाणपत्रे देण्यात येणार आहेत. तरी जळगावकर रसिकांनी या महोत्सवाला उपस्थित राहून, महाराष्ट्राच्या लोककला आणि बालकलावंतांना प्रोत्साहन द्यावे, असे आवाहन बालरंगभूमी परिषद जळगाव जिल्हा शाखेतर्फे करण्यात आले आहे.