एरंडोलमध्ये ट्रकवरील सबमर्सीबल व सोलर पंप चोरीचा छडा; तीन आरोपी जेरबंद
जळगाव: एरंडोल तालुक्यात ट्रकमधून सबमर्सीबल आणि सोलर पंपची चोरी करणाऱ्या तीन चोरट्यांना स्थानिक गुन्हे शाखेच्या (LCB) पथकाने अटक केली आहे. सुमारे २ लाख ३५ हजार रुपये किमतीच्या या चोरीचा गुन्हा उघडकीस आणल्यानंतर आरोपींना पुढील कारवाईसाठी एरंडोल पोलिसांच्या ताब्यात देण्यात आले आहे.
३१ मे २०२५ रोजी एरंडोल तालुक्यातील उमरदे गावाजवळ रस्त्यावर उभ्या असलेल्या ट्रकमधून चोरट्यांनी २ लाख ३५ हजार रुपये किमतीचे सबमर्सीबल आणि सोलर पंप चोरले होते. या प्रकरणी एरंडोल पोलीस ठाण्यात गुन्हा दाखल करण्यात आला होता. या गुन्ह्याचा समांतर तपास जळगाव स्थानिक गुन्हे शाखेचे पथक करत होते.
तांत्रिक विश्लेषण आणि गुप्त बातमीदारांकडून मिळालेल्या माहितीनुसार, हा गुन्हा आकाश लालचंद मोरे (रा. मुगपाठ-पदमालय) याने आपल्या साथीदारांच्या मदतीने केल्याचे निष्पन्न झाले. त्यानंतर पोलिसांनी आकाश मोरे याला पदमालय परिसरातून ताब्यात घेतले.
पोलिसी खाक्या दाखवताच आकाश मोरेने हा गुन्हा भरत बाबुराव बागुल, पृथ्वीराज रतीलाल पाटील आणि पंकज रवी बागुल यांच्या साथीने केल्याची कबुली दिली. या माहितीच्या आधारे पोलिसांनी आकाश मोरे, भरत बागुल आणि पृथ्वीराज पाटील या तिघांनाही अटक केली. त्यांना पुढील तपासकामी एरंडोल पोलिसांच्या ताब्यात देण्यात आले आहे.
ही यशस्वी कारवाई स्थानिक गुन्हे शाखेचे पोलीस निरीक्षक संदीप पाटील यांच्या मार्गदर्शनाखाली पोलीस उपनिरीक्षक जितेंद्र वाल्टे, हवालदार संदीप पाटील, हरीलाल पाटील, प्रवीण मांडोळे आणि पोलीस कॉन्स्टेबल राहुल कोळी, दीपक चौधरी यांच्या पथकाने केली.
