अमळनेर l महा पोलीस न्यूज l १५ मे २०२५l
भुसावळहून नंदुरबारच्या दिशेने जाणारी मालगाडी गुरुवारी (दि. १५ मे) दुपारी दोन वाजेच्या सुमारास प्रताप महाविद्यालयाजवळ रुळावरून घसरली. सुदैवाने या अपघातात कोणतीही जीवितहानी झाली नसून, लोको पायलट आणि गार्ड पूर्णपणे सुरक्षित आहेत. मात्र, काही डबे रुळावरून घसरल्याने आजूबाजूच्या रुळांचे नुकसान झाले आहे, ज्यामुळे सुरत-भुसावळ रेल्वे मार्गावरील वाहतूक पूर्णपणे ठप्प झाली आहे. यामुळे प्रवासी गाड्यांच्या वेळापत्रकावर परिणाम होऊन प्रवाशांना मोठा त्रास सहन करावा लागत आहे.
ही घटना अमळनेर रेल्वे स्थानकापासून काही अंतरावर घडल्याने रेल्वे अधिकाऱ्यांनी तातडीने घटनास्थळी धाव घेत दुरुस्तीच्या कामाला सुरुवात केली. रेल्वे प्रशासन युद्धपातळीवर रुळ दुरुस्तीचे काम करत असून, लवकरात लवकर वाहतूक सुरळीत करण्याचे प्रयत्न सुरू आहेत.
अपघाताच्या कारणांबाबत अद्याप स्पष्ट माहिती उपलब्ध झालेली नाही, आणि रेल्वे अधिकाऱ्यांनी याबाबत अधिक माहिती देण्यास नकार दिला आहे. तरीही, स्थानिक प्रशासन आणि रेल्वे कर्मचारी परिस्थिती नियंत्रणात आणण्यासाठी अथक परिश्रम घेत आहेत.
