निंबादेवी धरणातील बुडालेल्या तरुणाचा तिसऱ्या दिवशी मृतदेह सापडला; रामेश्वर कॉलनीत शोककळा
यावल प्रतिनिधी l यावल तालुक्यातील सावखेडा सीमजवळील निंबादेवी धरणात रविवारी सायंकाळी बुडून बेपत्ता झालेल्या तरुणाचा मृतदेह अखेर तिसऱ्या दिवशी सापडला. रामेश्वर कॉलनी, जळगाव येथील जतीन अतुल वार्डे (वय १८) असे तरुणाचे नाव आहे. तीन दिवस चाललेल्या शोध मोहिमेनंतर मंगळवारी धरणातून त्याचा मृतदेह बाहेर काढण्यात आला.
रविवारी सुट्टीचा दिवस असल्याने रामेश्वर कॉलनीतील आठ तरुण निंबादेवी धरण परिसरात फिरायला गेले होते. दुपारी ३ वाजता घरातून निघालेल्या या तरुणांनी सायंकाळी ४.३० वाजता धरण गाठले. थोड्याच वेळात काही तरुण पाण्यात अंघोळीसाठी उतरले. यादरम्यान, जतीन खोल पाण्यात गेला आणि बुडाला. इतरांनी मदतीचा प्रयत्न केला, मात्र कुणालाही पोहता येत नसल्याने तो अयशस्वी ठरला.
घटनेची माहिती मिळताच पोलिसांनी तातडीने घटनास्थळी धाव घेतली. पोलिस निरीक्षक रंगनाथ धारबळे यांच्या मार्गदर्शनाखाली सहाय्यक फौजदार विजय पाचपोळे, हवालदार अर्शद गवळी, मुकेश पाटील, अमित तडवी, संतोष पाटील यांच्यासह पथकाने शोधमोहीम सुरू केली. मात्र, अंधार पडल्याने मोहीम तात्पुरती थांबवावी लागली.
तिसऱ्या दिवशी मारुळ व लोसनबर्डी येथील कुशल पोहणाऱ्यांच्या मदतीने धरणात पुन्हा शोधमोहीम राबवली गेली. अखेर जतीनचा मृतदेह सापडला. यावल ग्रामीण रुग्णालयात डॉ. प्रशांत जावळे यांनी शवविच्छेदन केले.
या घटनेने रामेश्वर कॉलनी परिसरात हळहळ व्यक्त केली जात असून, तरुणाच्या मृत्यूमुळे परिसरात शोककळा पसरली आहे.
