महा पोलीस न्यूज । चेतन वाणी । हिमाचल प्रदेशातील शिमला जिल्ह्यातील रामपूर तालुक्यात हिंदुस्तान-तिबेट मार्गावरील बिथल (कालीमिट्टी) परिसरात झालेल्या भीषण अपघातात जळगाव येथील लक्ष्मी विराणी यांच्यासह एका महिलेचा मृत्यू झाला आहे. या दुर्घटनेत १५ हून अधिक प्रवासी जखमी झाले आहेत.
मिळालेल्या माहितीनुसार, मुसळधार पावसामुळे डोंगरावरून अचानक कोसळलेल्या प्रचंड दगडाने एका खासगी बसला जोरदार धडक दिली, ज्यामुळे हा अपघात घडला. घटनेची माहिती मिळताच पोलीस आणि बचाव पथके तात्काळ घटनास्थळी दाखल झाली. जखमींना त्वरित महात्मा गांधी वैद्यकीय सेवा केंद्र, खानरी (रामपूर उपजिल्हा) येथे दाखल करण्यात आले.
दोन महिलांचा मृत्यू
अपघातात दोन महिला ठार झाल्या असून त्यात जळगावच्या लक्ष्मी विराणी यांचा समावेश आहे. त्यांचा मृतदेह सध्या रामपूर उपजिल्हा रुग्णालयात ठेवण्यात आला असून, उद्या सकाळी शवविच्छेदनानंतर तो त्यांचे सहकारी तरुण रामचंदानी (वय २६) यांच्या ताब्यात देण्यात येईल. त्यानंतर मृतदेह जळगावला पाठवण्याची व्यवस्था केली जाणार आहे.
जिल्हा प्रशासनाने साधला संपर्क
जळगाव जिल्हा प्रशासनाने तातडीने शिमला जिल्हा प्रशासन आणि हिमाचल प्रदेश शासनाशी संपर्क साधून आवश्यक समन्वय साधला. जिल्हाधिकारी डॉ.आयुष प्रसाद यांनी त्वरित संपर्क साधून पुढील कार्यवाही केली आहे.
जळगावात शोककळा
या दुर्दैवी घटनेमुळे लक्ष्मी विराणी यांच्या कुटुंबीय, सहकारी आणि मित्रपरिवारावर दुखाचा डोंगर कोसळला आहे.
पहा संपूर्ण व्हिडिओ :
