अल्पवयीन मुलीला लग्नाचे आमिष दाखवून पळवणारा आरोपी ४८ तासांत तेलंगणातून जेरबंद

अल्पवयीन मुलीला लग्नाचे आमिष दाखवून पळवणारा आरोपी ४८ तासांत तेलंगणातून जेरबंद

पुसद ग्रामीण पोलिसांची तत्पर कारवाई; पीडितेची सुटका

यवतमाळ प्रतिनिधी

पुसद ग्रामीण पोलीस ठाण्याच्या हद्दीत अल्पवयीन मुलीला लग्नाचे आमिष दाखवून पळवून नेणाऱ्या आरोपीला अवघ्या ४८ तासांत तेलंगणा राज्यातून अटक करण्यात यवतमाळ पोलिसांना यश आले आहे. पुसद येथील मधुकर नगरचा रहिवासी शेख अन्वर शेख महेबुब (वय ३४) याला हैदराबाद परिसरातून ताब्यात घेऊन पीडित मुलीची सुटका करण्यात आली. ही तत्पर कारवाई पोलिसांच्या प्रभावी तपास आणि समन्वयाचे उत्तम उदाहरण ठरली आहे.

पुसद ग्रामीण पोलीस ठाण्यात ५ एप्रिल २०२५ रोजी फिर्यादीने तक्रार नोंदवली की, त्यांची अल्पवयीन नातेवाईक मुलगी यांना आरोपी शेख अन्वर शेख महेबुब याने लग्नाचे आमिष दाखवून फूस लावून पळवून नेले आहे. या तक्रारीवरून गुन्हा क्रमांक २१८/२०२५ (कलम १३७(२) बी.एन.एस.) अंतर्गत गुन्हा दाखल करण्यात आला. पोलीस अधीक्षक कुमार चिंता, अपर पोलीस अधीक्षक पियुष जगताप आणि उपविभागीय पोलीस अधिकारी हर्षवर्धन बी.जे. यांनी तातडीने आरोपी आणि पीडितेचा शोध घेण्याचे आदेश दिले. त्यानुसार विशेष पथक तयार करून शोधकार्याला सुरुवात झाली.

तेलंगणात सापळा

६ एप्रिल २०२५ रोजी गुप्तचरांकडून मिळालेल्या खात्रीलायक माहितीवरून आरोपी शेख अन्वर हा पीडितेसह तेलंगणा राज्यातील हैदराबाद परिसरात असल्याचे समजले. पथकाने तातडीने तेलंगणात धाव घेतली. सायबर सेल, यवतमाळ यांच्याकडून मिळालेल्या तांत्रिक माहितीच्या आधारे आणि कसोशीच्या शोधानंतर आरोपी आणि पीडिता हैदराबादजवळील भुवनगिरी येथे आढळले. पथकाने रीतसर कारवाई करत दोघांना ताब्यात घेतले आणि पुसद ग्रामीण पोलीस ठाण्यात आणून आरोपीला अटक केली. सध्या या प्रकरणाचा पुढील तपास पोलीस उपनिरीक्षक शेख जब्बार करत आहेत.

ही यशस्वी कारवाई पोलीस अधीक्षक कुमार चिंता, अपर पोलीस अधीक्षक पियुष जगताप आणि उपविभागीय पोलीस अधिकारी हर्षवर्धन बी.जे. यांच्या मार्गदर्शनाखाली पार पाडली गेली. पथकात सहायक पोलीस निरीक्षक सुरेंद्र राउत (ठाणेदार, पुसद ग्रामीण), सहायक फौजदार शेख मसूद (क्र. १६६४), पोलीस अंमलदार योगेश आळणे (क्र. २६२०), शरद लेनगुरे (क्र. १२८८) आणि महिला सैनिक वनमाला सोळंके यांचा समावेश होता.

अल्पवयीन मुलीला पळवून नेणाऱ्या आरोपीला ४८ तासांत शोधून अटक करणे आणि पीडितेची सुरक्षित सुटका करणे, हे यवतमाळ पोलिसांच्या कार्यक्षमतेचे द्योतक आहे. या कारवाईमुळे स्थानिकांमध्ये पोलिसांबद्दल विश्वास वाढला असून, गुन्हेगारीला आळा घालण्यासाठी पोलिसांचे प्रयत्न अधिक तीव्र झाल्याचे दिसून येते.