चोपडा अभियांत्रिकी व तंत्रनिकेतन महाविद्यालयात क्रांतीज्योती सावित्रीबाई फुले जयंती उत्साहात साजरी
चोपडा अभियांत्रिकी व तंत्रनिकेतन महाविद्यालयात क्रांतीज्योती सावित्रीबाई फुले जयंती उत्साहात साजरी
स्त्री शिक्षण व सामाजिक न्यायाच्या विचारांचा जागर
चोपडा (प्रतिनिधी) : श्रीमती शरच्चंद्रिका सुरेश पाटील इन्स्टिट्यूट ऑफ टेक्नॉलॉजी (इंजिनिअरिंग अँड पॉलीटेक्निक), चोपडा येथे शनिवार, दि. ३ जानेवारी २०२६ रोजी थोर समाजसुधारिका, स्त्री शिक्षणाच्या प्रणेत्या क्रांतीज्योती सावित्रीबाई फुले यांची जयंती अत्यंत उत्साहपूर्ण वातावरणात साजरी करण्यात आली.
कार्यक्रमाची सुरुवात सावित्रीबाई फुले यांच्या प्रतिमेचे पूजन व माल्यार्पण करून करण्यात आली. यावेळी महाविद्यालयाचे प्राचार्य, सर्व विभागप्रमुख, प्राध्यापकवृंद, शिक्षकेतर कर्मचारी तसेच विद्यार्थी-विद्यार्थिनी मोठ्या संख्येने उपस्थित होते.
कार्यक्रमप्रसंगी प्राचार्य प्रा. व्ही. एन. बोरसे यांनी सावित्रीबाई फुले यांच्या शैक्षणिक व सामाजिक कार्यावर सविस्तर प्रकाश टाकला. स्त्री शिक्षण, समानता आणि सामाजिक न्यायासाठी त्यांनी आयुष्यभर केलेल्या संघर्षाचे महत्त्व अधोरेखित करत, आजच्या पिढीने त्यांचे विचार आत्मसात करण्याची गरज असल्याचे त्यांनी सांगितले.
सावित्रीबाई फुले यांनी प्रतिकूल परिस्थितीतही शिक्षणाचा दिवा समाजात प्रज्वलित केला, स्त्रियांच्या हक्कांसाठी आवाज उठवला आणि समाज परिवर्तनाची चळवळ उभी केली, असे मत यावेळी व्यक्त करण्यात आले. कार्यक्रमातून विद्यार्थ्यांमध्ये सामाजिक भान, समानतेचे मूल्य आणि शिक्षणाचे महत्त्व अधोरेखित करण्यात आले.
जयंतीनिमित्त आयोजित या उपक्रमामुळे महाविद्यालयात प्रेरणादायी वातावरण निर्माण झाले असून, सावित्रीबाई फुले यांच्या विचारांची ऊर्जा नव्या पिढीपर्यंत पोहोचवण्याचा प्रयत्न यशस्वी ठरल्याचे चित्र पाहायला मिळाले.
