महा पोलीस न्यूज । दि.१० मार्च २०२५ । उन्हाचा वाढलेला पारा, दुपारची वेळ त्यातच तालुका पोलीस ठाण्यात एक जेष्ठ महिला भयभीत होऊन येते. महिलेला धीर देत पोलिसांनी सर्व माहिती जाणून घेतली. रिक्षात दागिने राहिल्याचे कळताच तालुका पोलिसांनी तत्परता दाखवली आणि काही वेळातच दागिने परत मिळवून दिले. पोलिसांनी दाखवलेल्या तत्परतेचे सर्वत्र कौतुक होत आहे.
अशी घडली घटना
खोटेनगर परिसरातील पुंडलिक ऑर्केड येथे राहणाऱ्या रिना भानुदास पाटील (वय ६५) या दुपारी एरंडोल येथे मुलीकडे जाण्यासाठी पोलीस ठाण्यासमोरून रिक्षात बसल्या होत्या. मात्र, खोटे नगर स्टॉपवर उतरतानाच्या घाईगडबडीत त्यांचा बटवा रिक्षातच राहिला. त्यात दहा ग्रॅम सोन्याची चैन आणि पाच ग्रॅम सोन्याची अंगठी होती.
पोलिसांची तत्परता आणि शोधमोहीम
रिना पाटील यांना हे लक्षात आल्यानंतर त्यांनी तत्काळ तालुका पोलीस ठाणे गाठले आणि आपली आपबिती पोलिसांना सांगितली. घटनेची माहिती मिळताच बीट मार्शल गस्त करणारे पोलीस कर्मचारी निंबा भदाणे, होमगार्ड राकेश पाटील आणि मदतनीस बंटी यांनी तातडीने तपास सुरू केला. खोटे नगर रिक्षा स्टॉप तसेच परिसरातील सीसीटीव्ही फुटेज तपासले असता त्यांनी रिक्षाचा क्रमांक शोधला. त्यावरून त्यांनी चालकाचा संपर्क मिळवला.
पोलिसांच्या तत्परतेने दागिने मिळाले परत
पोलिसांनी रिक्षाचालकाशी संपर्क साधला असता तो त्या महिलेला सोडून घरी जेवणासाठी गेला होता. पोलिसांनी विचारणा केली असता तो बटवा रिक्षातच पडून होता. पोलिसांनी तत्काळ हा मुद्देमाल ताब्यात घेतला आणि रिना पाटील यांना परत केला. आपल्या दागिन्यांची सुरक्षित परतफेड झाल्यामुळे त्यांनी पोलिसांचे आभार मानले.
पोलिसांची जनतेला सतर्कतेची सूचना
या प्रसंगातून नागरिकांनी आपली मौल्यवान वस्तूंची काळजी घ्यावी आणि सार्वजनिक वाहनातून उतरताना आपले सामान नीट तपासावे, असे आवाहन पोलिसांनी केले आहे. तसेच, हरवलेल्या वस्तू आढळल्यास प्रामाणिकपणे परत करण्याचे संस्कार समाजाने जपावेत, असे आवाहन पोलीस निरीक्षक संजय गायकवाड यांनी केले आहे.
