महा पोलीस न्यूज | ८ मे २०२४ | जळगाव शहरातील गेंदालाल मील परिसरात बुधवारी पहाटे ३.३० वाजेच्या सुमारास एकाने जुन्या वैमनस्यातून हवेत दोन राऊंड फायर केले होते. शहर पोलीस ठाण्यात याप्रकरणी गुन्हा दाखल झाल्यानंतर डीबी पथकाने अवघ्या ५ तासात संशयीत आरोपीच्या नशिराबाद येथून मुसक्या आवळल्या आहेत. अस्लम भिकन शेख ऊर्फ बाबुराव वय – २४ रा. गेंदालाल मील, जळगाव असे आरोपीचे नाव आहे.
जळगाव शहरातील गेंदालाल मील परिसरात राहणाऱ्या अली सैय्यद रज्जाक यांचा मुलगा काशिम याच्यासोबत दि.५ मे रोजी रात्री मौला अली मौला उरूस संदल कार्यक्रम संपल्यावर संशयीत आरोपी अस्लम याच्याशी बॅनरवर नाव टाकण्यावरून वाद झाला होता. बुधवारी पहाटे ३.३० वाजेच्या सुमारास अस्लम भिकन शेख ऊर्फ बाबुराव वय – २४ रा. गेंदालाल मील, जळगाव, मूळ गाव साकरी, ता.भुसावळ हा त्यांच्या घरासमोर आला. जुन्या वादातून त्याने शिवीगाळ करीत दगडफेक सुरू केली.
आवाज आणि गोंधळाने अली सैय्यद रज्जाक परिवारासह बाहेर आले. घराबाहेर उभ्या असलेल्या अस्लम याने शिवीगाळ करीत हवेत गावठी पिस्तूलने २ राऊंड फायर केले. बुधवारी सकाळी याप्रकरणी अली सैय्यद रज्जाक यांच्या फिर्यादीवरून गुन्हा दाखल करण्यात आला. शहर पोलीस ठाण्याचे प्रभारी अधिकारी अनिल भवारी यांना गुप्त माहिती मिळाल्याने त्यांच्या पथकातील पोलीस उपनिरीक्षक सर्जेराव शिरसगर, सहाय्यक फौजदार सुनील पाटील, भास्कर ठाकरे, सुधीर सावळे, योगेश पाटील, अमोल ठाकूर, रतन गिते यांनी नशिराबाद उड्डाणपूल खालून अस्लम याला अटक केली.
