महा पोलीस न्यूज । दि.२ जानेवारी २०२५ । आग्रा येथील एक व्यापारी जळगाव रेल्वे स्थानकावर उतरला असता जळगावातील तीन तरुणांनी त्याला घेरले. धमक्या देत मारहाण करून तरुणाला दुचाकीवर बसवले. गावच्या बाहेर घेऊन जात खोट्या केसमध्ये फसवण्याची धमकी देऊन २० हजार रुपयांची मागणी केली. ऑनलाईन २ हजार घेतल्यानंतर त्याला धमकी देऊन सोडून दिले. शहर पोलिसांनी अवघ्या २ तासात गुन्ह्याची उकल करून तिघांच्या मुसक्या आवळल्या आहेत. उपविभागीय पोलीस अधिकारी संदीप गावीत यांनी याबाबत माहिती दिली.
पोलिसांनी दिलेल्या माहितीनुसार, आग्रा येथील व्यापारी शाहिद मुन्ना कुरेशी हे दिनांक १ फेब्रुवारी रोजी दुपारी ३:३० वाजता जळगाव रेल्वे स्टेशनवर उतरले. पानटपरीवर पान खात असताना त्यांच्या मोबाईलमध्ये गायीचे व्हिडिओ दिसल्याने तीन मुलांनी त्यांना मारहाण करत व खोट्या केसमध्ये फसवण्याची धमकी दिली. गायींना कापून त्याचा व्यवसाय करीत असल्याचे धमकावत त्याला दुचाकीवर बसवून अपहरण केले.
तिघांनी २ हजार उकळले, पोलिसात गुन्हा दाखल
धमकी देत मारहाण करून तिघांनी त्याच्याकडून २० हजार रुपयांची मागणी केली. शाहिद मुन्ना कुरेशी यांनी घाबरून वडिलांकडून २ हजार रुपये मागवून घेतले. एका पेटीएम सेंटरवरून पैसे काढून घेत पोलिसात गेल्यास जीवे मारण्याची धमकी दिली आणि नंतर त्यांना सोडून दिले. सायंकाळी या घटनेची नोंद जळगाव शहर पोलीस स्टेशनमध्ये करून गुन्हा दाखल करण्यात आला.
सीसीटीव्हीच्या मदतीने तिघांना पकडले
गुन्ह्याचे गांभीर्य ओळखून पोलिसांनी आरोपींचा शोध सुरू केला. रेल्वे स्टेशनवरील सीसीटीव्ही फुटेज तपासले असता संशयित आरोपींची माहिती मिळाली. पोलिसांनी संशयीत मनोज आधार सोनवणे (वय २३), यश रविंद्र पाटील (वय २१) आणि महेंद्र पांडुरंग पाटील (वय २८) यांना त्यांच्या घरी जाऊन ताब्यात घेतले. चौकशीत त्यांनी गुन्हा कबूल केला असून त्यांच्याकडून मुद्देमाल हस्तगत करण्यात आला आहे.
या पथकाने केली कामगिरी
संपूर्ण कामगिरी पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावीत यांच्या मार्गदर्शनाखाली पोलीस निरीक्षक अनिल भवारी यांच्या पथकातील सपोनि रामचंद्र शिखरे, सफौ. सुनिल पाटील, पोहेकॉ संतोष खवले, पोहेकॉ उमेश भांडारकर, पोहेकॉ सतिश पाटील, पोहेकॉ भास्कर ठाकरे, पोहेकॉ योगेश पाटील, पोहेकॉ किशोर निकुंभ, पोना चंदु सोनवणे, पोकॉ.अमोल ठाकूर, पोकॉ.पांचाळ, पोकॉ. प्रणय पवार यांनी केली आहे.
