धरणगाव प्रतिनिधी :- गुजरात राज्यातील गांधीधाम येथून कच्चे सोयाबीन तेल घेऊन जाणाऱ्या टँकरला ट्रेलर ने दिलेल्या धडकेत झालेल्या अपघातात टँकरची टाकी फुटून सर्वत्र तेल सांडल्याची घटना धरणगाव तालुक्यातील पाळधी गावाजवळील सावदा फाट्याच्या वळण रस्त्यावर शनिवारी रात्री घडली. दरम्यान अपघाताची माहिती कळताच तेल भरण्यासाठी नागरिकांनी मोठ्या प्रमाणावर गर्दी केल्याचे चित्र पाहायला मिळाले.
तेल भरलेला टैंकर क्रमांक(जीजे-१२, बीएक्स-५०१९) हा गुजरात मधून अमरावतीला जात असताना महामार्गावरील पाळधी वळण रस्त्याजवळ धुळे येथून सळई घेऊन जाणाऱ्या ट्रेलर क्रमांक (एनएल-०१, एजे- ४८२८) ने या टँकरला समोरून जोरदार धडक दिल्याने टँकर उलटून तेलाची टाकी फुटली. यामुळे सर्वत्र तेल साचल्याने नागरिकांनी तेल उचलण्यासाठी गर्दी केली. दरम्यान अपघातानंतर पोलिसांनी घटनास्थळी धाव घेत वाहतूक सुरळीत करण्याचे काम केले.
याबाबत राजस्थामधील मागुडा येथील टँकर चालक रसूलखान साजनखान याने दिलेल्या फिर्यादीनुसार ट्रेलर चालक विजय बळीराम चौधरी याच्याविरोधात गुन्हा दाखल करण्यात आला आहे. तपास पाळधी पोलीस करत आहेत.
