भडगाव तालुक्यात अवैध वाळू वाहतूक करणारे तीन डंपर पकडले
नालबंदी ते पळासखेडा गावादरम्यानची घटना
भडगाव -प्रतिनिधी
भडगाव तालुक्यात व शहरात सध्या गिरणा नदी पात्रातील अवैध वाळू वाहतूक हा संपूर्ण जिल्ह्यात चर्चेचा विषय ठरत असून यावर सतत कारवाई करून सुद्धा वाळूमाफिया हे गिरणा नदी पात्रातून अवैध वाळू उत्खनन सुरूच ठेवत आहेत यावर आज सकाळी चाळीसगाव डी वाय एस पी यांच्या पथकातील संभाजी पाटील, रविंद्र पाटील, ज्ञानेश्वर बडगुजर, प्रकाश महाजन, यांनी सकाळी सहा वाजता नालबंदी ते पळासखेडा गावादरम्यान तीन दहा टायरी वाळू भरलेले डंपर पकडून ते डंपर पोलीस स्टेशन येथे जमा करण्यात आले आहे. या अवैध वाळूचे तीनही डंपर पोलिसांनी महसूल विभागाकडे वर्ग करण्यात आले असल्याची माहिती मिळाली आहे.
याबाबत अधिक माहिती अशी की भडगाव तालुक्यात व भडगाव शहरात गिरणा नदी पात्रातून दररोज 50 ते 60 डंपर व शेकडो ट्रॅक्टर हे अवैध वाळू वाहतूक करतात यावर गेल्या दोन महिन्यांपासून भडगाव महसूल विभागाने त्यांच्यावर कारवाईचा बडगा उचललेला आहे व तो बडगा कायम सुरू राहणार आहे. यातच आज सकाळी चाळीसगाव विभागाचे उपविभागीय पोलीस अधिकारी श्री राजेश चंदेल यांच्या पथकाने
नालबंदी ते पळासखेडा गावाच्या दरम्यान या तीनही डम्परांवर कारवाई केली. अवैध वाळू वाहतुकीचे येथीलही डंपर पोलीस स्टेशन येथे जप्त करण्यात आले असून ते पुढील कारवाईसाठी भडगाव महसूल विभागाकडे वर्ग करण्यात आले असल्याचे सांगण्यात आले.
