महा पोलीस न्यूज । दि.२४ एप्रिल २०२५ । जळगाव शहरातील मू.जे.महाविद्यालय मागील बाजूला असलेल्या मीनाताई ठाकरे कॉम्प्लेक्ससमोर आज रात्री १० वाजेच्या सुमारास गोळीबार झाल्याची धक्कादायक घटना घडली. महेंद्र उर्फ दादू समाधान सपकाळे (वय २२) रा.प्रबुद्ध नगर पिंप्राळा या तरुणावर गोळीबार करण्यात आला असून तो गंभीर जखमी झाला आहे. गोळी कमेरेच्या हाडात फसल्याची माहिती मिळाली आहे.
प्राथमिक माहितीनुसार, प्रबुद्ध नगर पिंप्राळा याठिकाणी राहणाऱ्या महेंद्र उर्फ दादू समाधान सपकाळे (वय २२) यांचा राम नवमीच्या दिवशी नाचण्यावरून काही तरुणांशी वाद झाला होता. त्यानंतर देखील एकदा या प्रकरणात पुन्हा वाद निर्माण झाला होता. याप्रकरणी रामानंद नगर पोलीस ठाण्यात अदखलपात्र गुन्हा दाखल करण्यात आला होता.
वाढदिवस साजरा करताना गोळीबार
गुरुवारी रात्री १० वाजेच्या सुमारास भूषण अहिरे याच्या वाढदिवसानिमित्त केक कापण्यासाठी महेंद्र सपकाळे हा गेलेला होता. त्यावेळी अचानक त्याच्यावर हल्ला झाला. हल्लेखोरांनी बरेच राउंड फायर केल्याची माहिती असून, हल्लेखोरांनी ३ ते ४ बंदुका आणि काही धारदार शस्त्रे वापरल्या गेल्याचे प्रत्यक्षदर्शींनी सांगितले.
धावत घरात शिरल्याने वाचला जीव
हल्लेखोर गोळीबार करत असताना महेंद्र सपकाळे जीव वाचवण्यासाठी पळत सुटला आणि जवळच्याच एका घरात लपल्याने त्याचा जीव वाचला. धावताना महेंद्र याला एक गोळी लागली असून ती त्याच्या कमरेत अडकली आहे. जखमीला जिल्हा रुग्णालयातून खाजगी रुग्णालयात हलवण्यात आले आहे.
वरीष्ठ अधिकाऱ्यांनी दिली भेट
घटनेनंतर अपर पोलीस अधीक्षक अशोक नखाते, उपविभागीय पोलीस अधिकारी संदीप गावीत, रामानंद नगर पोलीस आणि जिल्हापेठ पोलीस यांनी जखमीची विचारपूस करत चौकशी केली. घटनास्थळी स्थानिक गुन्हे शाखेचे निरीक्षक बबन आव्हाड, रामानंद नगर पोलीस निरीक्षक राजेंद्र गुंजाळ व इतर अधिकारी घटनास्थळी दाखल झाले असून, तपास सुरू आहे.
दोन राउंड, एक तलवार मिळाल्याची माहिती
घटनास्थळी पोलिसांनी पाहणी केली असून त्याठिकाणी २ काडतूस मिळाल्याची माहिती आहे. तसेच पोलिसांनी संशयिताच्या घरी पाहणी केली असता एक तलवार मिळून आल्याची माहिती आहे. जखमी महेंद्र सपकाळे याच्यासह मित्रांनी हा हल्ला विशाल कोळी, बाबू धोबी आणि इतरांनी केल्याची माहिती पोलिसांना दिली आहे.
