महा पोलीस न्यूज । २५ मे २०२४ | जळगाव शहरातील शिवाजीनगर हुडको परिसरात राहणाऱ्या काही तरुणांनी घरात धारदार शस्त्रे घेऊन नाचत व्हिडीओ तयार केला. व्हायरल व्हिडीओबाबत शहर पोलिसांना याबाबत माहिती मिळताच त्यांनी एकाला ताब्यात घेतले आणि त्याची चौकशी करीत इतर तिघांच्या मुसक्या आवळल्या. चौघांकडून २ चॉपर, १ तलवार आणि १ चाकू हस्तगत करण्यात आला आहे.
जळगाव शहरातील शिवाजीनगर हुडको परिसरातील काही तरुणांनी घरात गाण्यांवर नाचत हातात धारदार शस्त्रे घेऊन व्हिडीओ तयार केला होता. व्हिडीओ व्हायरल होताच शहर पोलीस ठाण्यातील कर्मचारी तेजस मराठे यांना याबाबत माहिती मिळाली होती. शहर पोलीस ठाण्याचे निरीक्षक अनिल भवारी यांनी याबाबत लागलीच पथकाला सूचना देत संशयितांना पकडण्याचे सांगितले होते. शहर पोलीस ठाण्याच्या डीबी पथकाने शोध सुरु केला.
शिवाजीनगर हुडको भागात दिपक बागुल याचे घराचे समोर मंदिराजवळ व्हिडीओमधील इसम दिसल्याने त्यांना ताब्यात घेतले. पोलिसांनी दिपक सखाराम बागुल वय-३२, तुषार संतोष जाधव वय-२२, मनिष राजेंद्र बि-हाडे वय-२०, संतोष कडु तायडे वय-३२, सर्व रा.शिवाजी नगर हुडको असे त्यांनी सांगितले. सर्वांना व्हायरल व्हिडीओ दाखवुन त्यांना विचारले असता व विश्वासात घेवुन विचारपुस करता त्यांनी व्हिडीओमधील तेच असल्याचे मान्य करुन व्हिडीओमधील तलवार, कोयता, चॉपर हे आमचे घरी ठेवले आहे असे सांगितले व त्यांनी त्यांचे घरी ठेवलेले तलवार, कोयता, चॉपर पंचासमक्ष काढून दिले.
संपूर्ण कामगिरी पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावीत, पोलीस निरीक्षक अनिल भवारी यांच्या मार्गदर्शनाखाली सहाय्यक फौजदार सुनिल पाटील, हवालदार उमेश भांडारकर, किशोर निकुंभ, भास्कर ठाकरे, सुधीर सावळे, योगेश पाटील, रतन गिते, तेजस मराठे यांच्या पथकाने केली आहे.
पोलिसांनी चौघांकडून १ तलवार, २ चॉपर, १ चाकू अशी शस्त्रे जमा केली आहे. शहर पोलीस ठाण्यात अमोल ठाकूर यांच्या फिर्यादीवरून गुन्हा दाखल करण्यात आला असून तपास उमेश भांडारकर करीत आहे. चौघांना न्यायालयात हजर करण्यात आले असता न्यायालयीन कोठडी सुनावण्यात आली आहे.
