विखरण शिवारातील पाटाच्या चारीत अनोळखी इसमाचा मृतदेह आढळला
विखरण, तालुक्यातील विखरण शिवारातील जवखेडे कडे जाणाऱ्या पाटाच्या चारीत ५० ते ५५ वयोगटातील अनोळखी इसमाचा मृतदेह आढळून आला. २५ मार्च २०२३ रोजी सकाळी १०.३० वाजता हा प्रकार उघडकीस आला.
घटनास्थळी मोटरसायकल आणि पिशवीत भाजीपाला
विखरणचे पोलीस पाटील शेतात जात असताना चारीजवळ गर्दी दिसली. त्यांनी पाहणी केली असता, झाडाच्या फांदीत अडकलेला मृतदेह आणि पाटाच्या पाण्यात एक विना क्रमांकाची डिस्कवर मोटरसायकल आढळली. तसेच, एका पिशवीत भाजीपाला आणि मेलेली कोंबडी देखील आढळून आली.
अपघात की अन्य कारण?
प्राथमिक तपासणीत सदर इसम मोटरसायकलवरून जात असताना तोल जाऊन पाटाच्या पाण्यात पडला असावा आणि बुडून २ ते ३ दिवसांपूर्वी मृत्यू झाला असावा, असा अंदाज वर्तविण्यात आला आहे.
पोलीस पाटलांनी तात्काळ पोलिसांना माहिती दिली. ग्रामीण रुग्णालयात मृतदेह पाठवण्यात आला असून ओळख पटलेली नाही. पुढील तपास पोलीस निरीक्षक निलेश गायकवाड यांच्या मार्गदर्शनाखाली सहायक पोलीस निरीक्षक राजेश पाटील आणि पोलीस हवालदार संदीप पाटील करत आहेत.
