महा पोलीस न्यूज । चेतन वाणी । जळगाव शहर महानगरपालिका निवडणुकीत शिवसेनेने (शिंदे गट) मिळवलेल्या दणदणीत यशानंतर आता महापालिकेत सत्तेच्या समीकरणांना वेग आला आहे. गुरुवारी नाशिक येथे विभागीय आयुक्तांकडे शिवसेनेच्या नगरसेवकांची अधिकृत गट नोंदणी करण्यात आली. यामध्ये जिल्हाप्रमुख आणि नवनिर्वाचित नगरसेवक विष्णू भंगाळे यांची गटनेतेपदी वर्णी लागली आहे.
नेत्यांच्या मार्गदर्शनाला मोठे यश
नुकत्याच झालेल्या निवडणुकीत शिवसेनेला जळगावात मोठे यश मिळाले असून पक्षाचे २२ नगरसेवक निवडून आले आहेत. राज्याचे पाणीपुरवठा व स्वच्छता मंत्री तथा जळगावचे पालकमंत्री गुलाबराव पाटील, आमदार चंद्रकांत पाटील आणि जिल्हाप्रमुख विष्णू भंगाळे यांच्या त्रिसूत्री नेतृत्वाखाली शिवसेनेने ही मुसंडी मारली आहे. या विजयामुळे जळगाव शहराच्या राजकारणात शिवसेनेचे वर्चस्व पुन्हा एकदा सिद्ध झाले आहे.
गट नोंदणी आणि नवीन जबाबदाऱ्या
नाशिक विभागीय आयुक्त कार्यालयात पार पडलेल्या या प्रक्रियेत शिवसेनेच्या नगरसेवकांनी आपला गट अधिकृतपणे नोंदवला. यावेळी पक्षांतर्गत जबाबदाऱ्यांचेही वाटप करण्यात आले. त्यात गटनेते विष्णू भंगाळे, उपगटनेते प्रतिभा देशमुख, प्रतोद (Whip) दिलीप पोकळे यांची निवड करण्यात आली.
विष्णू भंगाळे यांची गटनेतेपदी निवड झाल्याने कार्यकर्त्यांमध्ये उत्साहाचे वातावरण आहे. महापालिकेत आता शिवसेनेचा गट अधिकृतपणे कार्यरत झाला असून, आगामी काळात शहराच्या विकासकामांना गती देण्याचा मानस नवनियुक्त गटनेत्यांनी व्यक्त केला आहे.
