महा पोलीस न्यूज । १६ मे २०२५ । जळगाव शहरातील एमआयडीसी परिसरात एका लग्न समारंभात ८५ वर्षीय महिलेच्या गळ्यातील २१ ग्रॅम वजनाची चेन एकाने लंपास केली होती. फेब्रुवारी महिन्यात घडलेल्या घटनेप्रकरणी एमआयडीसी पोलिसात गुन्हा दाखल करण्यात आला होता. जळगाव एलसीबी पथकाने या प्रकरणी एकाला अटक केली आहे. अनिल विजय हरताडे रा,लक्ष्मी नगर, गेंदालाल मिल असे संशयिताचे नाव आहे.
जळगावातील एमआयडीसी परिसरात ६ फेब्रुवारी रोजी एका लग्न समारंभात ज्येष्ठ महिला पुष्पाबाई जगन्नाथ न्याती (वय ८५) यांच्या गळ्यातील २१ ग्रॅम वजनाची सोन्याची चेन चोरीला गेल्याची घटना रात्री ९ वाजेच्या सुमारास घडली घडली होती. पुष्पाबाई एका खोलीत होत्या. अज्ञात व्यक्तीने त्यांच्या गळ्याला काहीतरी लागल्याचे सांगून चेन चोरी केली होती. याप्रकरणी पुष्पाबाई यांचा मुलगा हेमंत जगन्नाथ न्याती यांनी एमआयडीसी पोलीस ठाण्यात तक्रार दाखल केली होती. त्यानुसार अज्ञात व्यक्तीविरुद्ध चोरीचा गुन्हा नोंदवण्यात आला होता.
पोलीस अधीक्षक डॉ.महेश्वर रेड्डी यांच्या सूचनेनुसार स्थानिक गुन्हे शाखेने या प्रकरणाचा तपास सुरू केला. वरिष्ठ पोलीस निरीक्षक बबन आव्हाड यांना मिळालेल्या गुप्त माहितीच्या आधारे संशयित अनिल हरताडे याला जळगाव शहरातून ताब्यात घेण्यात आले. चौकशीदरम्यान त्याने गुन्ह्याची कबुली दिली. त्याच्याकडून चोरीची माहिती उघड झाल्यानंतर त्याला एमआयडीसी पोलिसांच्या ताब्यात देण्यात आले. न्यायालयाने त्याला तीन दिवसांची पोलीस कोठडी सुनावली आहे.
संपूर्ण कामगिरी पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी संदीप गावित यांच्या मार्गदर्शनाखाली वरिष्ठ पोलीस निरीक्षक बबन आव्हाड यांच्या पथकातील पोलीस उपनिरीक्षक शरद बागल, सहाय्यक फौजदार विजयसिंह पाटील, अतुल वंजारी, पोलीस हवालदार अक्रम शेख आणि बाबासाहेब पाटील यांनी केली आहे. पुढील तपास एमआयडीसी पोलीस ठाण्याचे सहाय्यक फौजदार दत्तात्रय बडगुजर करत आहेत.
