महा पोलीस न्यूज । चेतन वाणी । जळगाव जिल्ह्यात गर्भधारणापूर्व व प्रसूतीपूर्व निदान तंत्र (PCPNDT) अधिनियम प्रभावीपणे राबविण्यासाठी जिल्हा सल्लागार समितीची पुनर्रचना करण्यात आली असून, सामाजिक कार्यकर्ते तथा उद्योजक पवन प्रकाश जैन यांची समितीवर सदस्य म्हणून नियुक्ती करण्यात आली आहे. जिल्हा शल्यचिकित्सक डॉ. स्वप्नील बी. सांगळे यांनी ३ जुलै रोजी यासंदर्भातील आदेश जारी केला आहे.
पीसीपीएनडीटी कायद्याच्या कलम १७ (५) नुसार प्रत्येक जिल्ह्यात सल्लागार समिती असणे बंधनकारक आहे. त्यानुसार जिल्ह्यातील नव्या समितीत वैद्यकीय, कायदा आणि सामाजिक क्षेत्रातील तज्ज्ञांसह पवन जैन यांचाही समावेश करण्यात आला आहे. समाजकार्यातील सक्रिय सहभाग, आरोग्यविषयक उपक्रमांमधील योगदान आणि विविध क्षेत्रातील अनुभवाची दखल घेत ही नियुक्ती करण्यात आल्याचे मानले जात आहे.
व्यवसायातून समाजसेवेपर्यंतचा प्रवास
वैद्यकीय, सामाजिक आणि व्यावसायिक क्षेत्रात स्वतंत्र ओळख निर्माण करणारे पवन प्रकाश जैन यांनी अल्पवयातच उद्योजकतेची वाट धरली. १९९८ साली त्यांनी ‘डॉ. डिलक्स फार्मा’ या औषध वितरण कंपनीची स्थापना केली. गुणवत्ता, पारदर्शकता आणि विश्वास या तत्त्वांवर उभी राहिलेली ही कंपनी आज ISO ९००१:२००८ प्रमाणित असून महाराष्ट्रासह देशभरात आपली वेगळी ओळख निर्माण करण्यात यशस्वी ठरली आहे.
हॉटेल व्यवसायातही यशस्वी वाटचाल
कोरोना महामारीच्या कठीण काळात त्यांनी संधीचे रूपांतर यशात करत ‘हॉटेल वेज अरोमा’ या शुद्ध शाकाहारी रेस्टॉरंटची स्थापना केली. त्यानंतर ‘गार्डन वेज अरोमा’ या बँक्वेट हॉलचीही उभारणी केली. आज विविध सामाजिक, कौटुंबिक आणि व्यावसायिक कार्यक्रमांसाठी ही दोन्ही ठिकाणे जळगावकरांची पसंती बनली आहेत.
समाजकार्यात कायम अग्रेसर
पवन जैन यांनी जळगाव औषध विक्रेता संघटनेचे सचिव आणि कोषाध्यक्ष म्हणूनही जबाबदारी सांभाळली आहे. रक्तदान शिबिरे, नेत्रतपासणी, औषध वितरण, आरोग्य जनजागृती अशा विविध सामाजिक उपक्रमांत त्यांचा सक्रिय सहभाग राहिला आहे. विशेषतः कोरोना काळात अनेक गरजू रुग्णांना औषधे, ऑक्सिजन आणि आवश्यक मदत उपलब्ध करून देत त्यांनी सामाजिक बांधिलकी जपली.
तरुणांसाठी प्रेरणादायी व्यक्तिमत्त्व
शालेय जीवनापासूनच वक्तृत्व, नेतृत्व आणि समाजसेवा यांची आवड जोपासणारे पवन जैन आजही तरुणांसाठी मार्गदर्शन शिबिरे, प्रेरणादायी संवाद आणि सामाजिक उपक्रमांचे आयोजन करत असतात. व्यवसायातील यशासोबत समाजहिताची जाणीव जपणारे आणि विविध क्षेत्रांत सकारात्मक योगदान देणारे नेतृत्व म्हणून त्यांनी स्वतःची वेगळी ओळख निर्माण केली आहे.
महत्त्वाची जबाबदारी
पीसीपीएनडीटी जिल्हा सल्लागार समिती गर्भलिंग निवडीस प्रतिबंध, सोनोग्राफी केंद्रांवर देखरेख, कायद्याची प्रभावी अंमलबजावणी आणि जिल्हा प्रशासनाला आवश्यक मार्गदर्शन करण्याचे काम करते. अशा महत्त्वाच्या समितीवर पवन प्रकाश जैन यांची झालेली नियुक्ती ही त्यांच्या सामाजिक कार्याची आणि सार्वजनिक विश्वासाची पोचपावती मानली जात आहे.
