जळगाव जिल्हा नियोजन समितीच्या बैठकीत ६७७ कोटींच्या निधीला मंजुरी
जळगाव: जळगाव जिल्ह्याच्या विकासाला चालना देण्यासाठी आज, २९ ऑगस्ट २०२५ रोजी जिल्हा नियोजन समितीची बैठक पार पडली. पालकमंत्री गुलाबराव पाटील यांच्या अध्यक्षतेखाली झालेल्या या बैठकीत जिल्ह्याच्या वार्षिक योजनेसाठी ६७७ कोटी रुपयांच्या निधीला मंजुरी देण्यात आली. यावेळी वस्त्रोद्योग मंत्री संजय सावकारे, खासदार स्मिता वाघ यांच्यासह जिल्ह्यातील अनेक आमदार आणि अधिकारी उपस्थित होते.
मागील वर्षाचा १००% निधी खर्च
या बैठकीत जिल्हा वार्षिक योजना २०२४-२५ मधील निधीचा सविस्तर आढावा घेण्यात आला. सर्वसाधारण योजनेतील ६०७ कोटी रुपये, अनुसूचित जाती उपयोजनेतील ९२ कोटी रुपये आणि आदिवासी उपयोजनेतील ५५.९९ कोटी रुपयांचा निधी १००% खर्च झाल्याचे यावेळी स्पष्ट करण्यात आले.
२०२५-२६ या आर्थिक वर्षासाठी मंजूर झालेल्या ६७७ कोटी रुपयांपैकी ३०% म्हणजेच २०३ कोटी रुपये जिल्ह्याला प्राप्त झाले आहेत. यापैकी १८.८० कोटी रुपये विविध यंत्रणांना वितरित करण्यात आले असून, ३७.५० कोटी रुपयांच्या कामांना प्रशासकीय मान्यता देण्यात आली आहे.
बैठकीतील महत्त्वाचे निर्णय
वन्यप्राण्यांचा उपद्रव: वन्यप्राण्यांमुळे शेतीत होणाऱ्या नुकसानीची दखल घेऊन वनविभागाला तात्काळ उपाययोजना करण्याचे निर्देश देण्यात आले.
गणेशोत्सवादरम्यान वीजपुरवठा खंडित होणार नाही यासाठी महावितरणला दक्षता घेण्याच्या सूचना देण्यात आल्या. तसेच, शेतकऱ्यांसाठी मंजूर झालेले रोहित्र तीन महिन्यांच्या आत बसवण्याचे आदेश देण्यात आले. आगामी स्थानिक स्वराज्य संस्थांच्या निवडणुका लक्षात घेऊन, आमदार आणि खासदारांच्या सहभागाने विकासकामांची यादी अंतिम करण्याचे निर्देश देण्यात आले.पिक विमा प्रकरणांची कार्यवाही विनाविलंब पूर्ण करण्याचे आदेश संबंधित विभागांना देण्यात आले.
या बैठकीत जिल्ह्याच्या विकासासाठी निधीच्या प्रभावी वापराबरोबरच नागरिकांच्या तातडीच्या प्रश्नांवरही त्वरित कार्यवाही करण्याचा निर्धार व्यक्त करण्यात आला.
