जळगाव (प्रतिनिधी) – जळगाव शहर पोलीस स्टेशन हद्दीत गुरुवारी पहाटे (दि. 11 सप्टेंबर) रात्रगस्तीदरम्यान पोलिसांनी मोठी कारवाई करत गावठी पिस्तुल, जिवंत काडतुसे आणि मॅगझिनसह चौघांना अटक केली आहे. ही कारवाई गेंदालाल मिल परिसरातील सुरेशदादा जैन यांच्या बंगल्यासमोर करण्यात आली.
गुन्हा करण्याच्या उद्देशाने अवैधरित्या गावठी पिस्तुल व जिवंत काडतुसे बाळगणारे आरोपी युनुस उर्फ सद्दाम सलीम पटेल (33, रा. गेंदालाल मिल), निजामोददीन शेख हुसेनोददीन शेख (31, रा. आझाद नगर), शोएब अब्दुल सईद शेख (29, रा. गेंदालाल मिल) व सौहिल शेख उर्फ दया सीआयडी युसुफ शेख (29, रा. शाहूनगर) अशी अटक करण्यात आलेल्या संशयितांची नावे आहेत.
गुप्त बातमीदारामार्फत पोलिसांना माहिती मिळाल्यानंतर गुन्हे शोध पथकाने संशयित कार अडवून चौकशी केली. सुरुवातीला आरोपींनी उडवाउडवीची उत्तरे दिली मात्र पोलिसी खाक्या दाखविल्यानंतर त्यांनी शस्त्र जवळ असल्याची कबुली दिली. अंगझडतीत युनुस पटेल याच्याकडून एक पिस्तुल व चार जिवंत राउंड मिळाले, तर कारच्या झडतीत आणखी एक पिस्तुल, सहा जिवंत राउंड, एक मॅगझिन आणि मारुती सुझुकी कार (क्र. MH-43 AR-9678) असा एकूण 1 लाख 78 हजार रुपयांचा मुद्देमाल जप्त करण्यात आला.
या प्रकरणी फिर्यादी पोलीस कॉन्स्टेबल प्रणय पवार यांच्या तक्रारीवरून जळगाव शहर पोलीस स्टेशनला गुन्हा दाखल करण्यात आला असून भारतीय हत्यार कायदा कलम 3/25 व इतर संबंधित कलमान्वये गुन्हा नोंदविण्यात आला आहे.
ही कारवाई पोलीस अधीक्षक महेश्वर रेड्डी, अप्पर पोलीस अधीक्षक अशोक नखाते, उपविभागीय अधिकारी नितीन गणापुरे व शहर पोलीस निरीक्षक सागर शिंपी यांच्या मार्गदर्शनाखाली करण्यात आली. पुढील तपास सहाय्यक पोलीस निरीक्षक सुरेश आव्हाड हे करीत आहेत.
