आदिवासी महिलेच्या भर रस्त्यावर प्रसूतीच्या घटनेवर जिल्हा परिषद सीईओ यांनी घेतली बैठक
जळगाव | प्रतिनिधी :
जळगाव जिल्ह्यातील चोपडा तालुक्यातील कर्जाने आरोग्य उपकेंद्राच्या कार्यक्षेत्रात येणाऱ्या एका आदिवासी महिलेला भर रस्त्यावर प्रसूती करावी लागल्याची गंभीर घटना समोर आली आहे. या घटनेच्या पार्श्वभूमीवर जिल्हा परिषदेच्या मुख्य कार्यकारी अधिकारी श्रीमती मिनल करनवाल यांनी तातडीने जिल्ह्यातील सर्व तालुका आरोग्य अधिकाऱ्यांची बैठक दि. 30 मे रोजी घेतली.
या बैठकीदरम्यान प्रमुख आरोग्य अधिकारी, वैद्यकीय अधिकाऱ्यांसमोर श्रीमती करनवाल यांनी स्पष्टपणे सांगितले की, ग्रामीण व आदिवासी भागांतील नागरिकांपर्यंत दर्जेदार व तत्पर आरोग्य सेवा पोहोचवणे ही आरोग्य विभागाची प्राथमिक जबाबदारी आहे आणि त्यात कोणतीही कुचराई सहन केली जाणार नाही.
बैठकीतील महत्त्वाचे निर्देश व सूचना:
• आदिवासी भागांसाठी कृती आराखडा तयार करणे: विशेषतः गर्भवती व बाळंत महिलांसाठी प्रभावी आरोग्य सेवा मिळवून देण्यासाठी नियोजनबद्ध कार्यवाही करण्याचे निर्देश.
• औषध वाटप योजना मजबूत करणे: आवश्यक औषधे वेळेवर व नियमितपणे वितरीत होणे अत्यावश्यक असल्याचे सांगितले.
• रुग्णवाहिकेची सेवा सुधारण्यावर भर: प्रत्येक रुग्णवाहिकेत जीपीएस ट्रॅकर बसवण्याचे आदेश दिले, जेणेकरून तिचे मूव्हमेंट ट्रॅक करता येईल व आपत्कालीन प्रसंगी वेळेवर पोहोचता येईल.
• आरोग्य कर्मचाऱ्यांना जबाबदारीने वागण्याचा आग्रह: सेवाभाव, तत्परता व शिस्तबद्धता ही आरोग्य कर्मचाऱ्यांची ओळख ठरली पाहिजे, असे स्पष्ट निर्देश दिले.
बैठकीस उपस्थित मान्यवर:
या बैठकीस लोकसंघर्ष मोर्चाच्या नेत्या सौ. प्रतिभा शिंदे जिल्हा आरोग्य अधिकारी डॉ. सचिन भायेकर, जिल्हा महिला व बाल विकास विभागाचे कार्यक्रम अधिकारी हेमंत भदाणे यांच्यासह अनेक वरिष्ठ आरोग्य अधिकारी उपस्थित होते.
सर्वांनी एकमताने यापुढे अशा प्रकारची घटना पुन्हा घडू नये यासाठी एकजूटीनं आणि जबाबदारीने कार्य करण्याचे आश्वासन दिले.
या बैठकीच्या माध्यमातून जिल्हा प्रशासनाने स्पष्ट संदेश दिला आहे की, ग्रामीण व विशेषतः आदिवासी भागातील आरोग्य सेवा ही प्राथमिकता असून, कोणत्याही प्रकारची हलगर्जी सहन केली जाणार नाही.
मुख्य कार्यकारी अधिकारी श्रीमती मिनल करनवाल यांचे स्पष्ट नेतृत्व आणि तात्काळ कृती यामुळे जिल्ह्यातील आरोग्य व्यवस्थेला एक नवे दिशा मिळण्याची अपेक्षा व्यक्त होत आहे.
