गावठी कट्टा विक्रीच्या तयारीत असलेला संशयित एलसीबीच्या जाळ्यात
जळगाव : चाळीसगाव येथे गावठी कट्टा विक्रीसाठी जाणाऱ्या मुद्दसीर नझर सलीम परवेझ शेख (रा. तांबापुरा, जळगाव) याला स्थानिक गुन्हे शाखेच्या (एलसीबी) पथकाने सापळा रचून ताब्यात घेतले. त्याच्याकडून एक गावठी कट्टा, पाच जीवंत काडतुसे, तलवार आणि दुचाकी (एमएच ४७, बीयू ०३७७) जप्त करण्यात आली आहे. याप्रकरणी त्याच्याविरुद्ध गुन्हा दाखल करण्यात आला आहे.एलसीबीला मिळालेल्या माहितीनुसार, मुद्दसीर हा तांबापुरा परिसरातून चाळीसगावला कट्टा विक्रीसाठी निघाला होता. शिरसोली रस्त्यावरील जकातनाका येथे उपनिरीक्षक शरद बागल, सफौ अतुल वंजारी, राजेश मेढे, हरिलाल पाटील, विजय पाटील आणि अक्रम शेख यांच्या पथकाने सापळा रचून त्याला पकडले. अंगझडतीदरम्यान त्याच्याकडून धारदार शस्त्र, गावठी कट्टा आणि काडतुसे जप्त करण्यात आली. पोलिसांनी पुढील तपास सुरू केला आहे.
