भुसावळात चार तलवारी जप्त ; तिघे जेरबंद !
स्थानिक गुन्हे शाखेच्या पथकाची कारवाई
भुसावळ, शहरातील इंदिरा नगर परिसरात अवैध शस्त्रसाठा बाळगणाऱ्या तीन तरुणांना जळगाव स्थानिक गुन्हे शाखेच्या (स्थागुशा) पथकाने अटक केली आहे. १ एप्रिल रोजी ही कारवाई करण्यात आली असून, संशयितांच्या ताब्यातून चार धारदार तलवारी जप्त करण्यात आल्या आहेत.
शहरात अवैध शस्त्र बाळगण्याच्या घटनांवर नियंत्रण ठेवण्यासाठी पोलीस प्रशासन सतर्क असून, इंदिरा नगर परिसरात काही तरुण धारदार तलवारी घेऊन फिरत असल्याची माहिती पोलिसांना मिळाली. यानंतर पोलीस निरीक्षक बबन आव्हाड यांच्या मार्गदर्शनाखाली पोलीस उपनिरीक्षक दत्तात्रय पोटे यांच्या नेतृत्वाखाली पथकाने छापा टाकला. यामध्ये पोहेकॉ. कमलाकर बागुल, गजानन देशमुख, गोपाल गव्हाळे, संघपाल तायडे आणि पोकॉ. सचिन पोळ यांनी संशयितांना पकडण्यासाठी सापळा रचला. पथकाने इंदिरा नगर परिसरात छापा टाकून भरत यादव खंडारे (वय 19), सागर अनिल संघवी (वय 20) आणि सागर राजू यादव (वय 25, सर्व रा. इंदिरा नगर, भुसावळ) यांना ताब्यात घेतले. त्यांच्याकडून एकूण चार धारदार तलवारी हस्तगत करण्यात आल्या असून, त्यांची अंदाजे किंमत ६,००० रुपये असल्याचे पोलिसांनी सांगितले.
तिघांवर भारतीय शस्त्र कायद्यांतर्गत गुन्हा दाखल करण्यात आला असून, पुढील कारवाईसाठी त्यांना भुसावळ बाजारपेठ पोलीस ठाण्याच्या ताब्यात देण्यात आले आहे.
