महा पोलीस न्यूज । पंकज शेटे । आपल्याच दहा वर्षांच्या अल्पवयीन मुलीसोबत अश्लील कृत्य केल्याप्रकरणी एका नराधम वडिलांविरुद्ध अमळनेर पोलिस ठाण्यात पोक्सो कायद्यांतर्गत गुन्हा दाखल करण्यात आला आहे. ही घटना दि.७ ऑगस्ट रोजी रात्री ९ वाजता घडली.
पीडित मुलीच्या आईने पोलिसांना दिलेल्या तक्रारीनुसार, ती आपल्या माहेरी असताना तिचा पती त्यांना भेटण्यासाठी आला. त्यावेळी त्याने आपल्या मुलीला जवळ घेऊन तिच्यासोबत अश्लील चाळे करण्यास सुरुवात केली. मुलीच्या आईने या कृत्याला विरोध करत त्याला जाब विचारला असता, त्याने मुलीला सोबत घेऊन जाण्याचा हट्ट धरला.
आईने पोलिसांत तक्रार करण्याची धमकी दिल्यावर तो घटनास्थळावरून पळून गेला. त्यानंतर पीडितेच्या आजीने ॲड.तमन्ना शाह आणि ॲड.मुस्कान शाह यांच्या मदतीने अमळनेर पोलिस ठाण्यात तक्रार दाखल केली. पोलिसांनी भारतीय न्याय संहिता कलम ७४, पोक्सो कायदा कलम ८, ९ (एल), ९ (एम), ९ (एन) आणि १० अंतर्गत आरोपी वडिलांविरुद्ध गुन्हा दाखल केला आहे. या प्रकरणाचा पुढील तपास पोलिस उपनिरीक्षक भगवान शिरसाठ करत आहेत.
