चाळीसगाव (भूषण शेटे): जळगाव पोलीस दलातर्फे आगामी सण-उत्सवांच्या पार्श्वभूमीवर कायदा व सुव्यवस्था राखण्यासाठी तयारी सुरू आहे. याच तयारीचा एक भाग म्हणून, आज दिनांक २३/०८/२०२५ रोजी सकाळी ९:०० ते १२:०० या वेळेत चाळीसगाव येथील श्री कोतकर कॉलेजच्या मैदानावर दंगा काबू (Riot Control) योजनेचा सराव करण्यात आला.
हा सराव मा. पोलीस अधीक्षक महेश्वर रेड्डी जळगाव यांच्या बिनतारी संदेशाद्वारे दिलेल्या सूचनेनुसार आयोजित करण्यात आला होता. अपर पोलीस अधीक्षक चाळीसगाव आणि उपविभागीय पोलीस अधिकारी चाळीसगाव यांच्या मार्गदर्शनाखाली हा दंगा काबू सराव यशस्वीपणे पार पडला.
या सरावामध्ये चाळीसगाव शहर पोलीस स्टेशनमधील ४ अधिकारी आणि ४० अंमलदार सहभागी झाले होते. त्यांच्यासोबतच चाळीसगाव ग्रामीण पोलीस स्टेशन आणि मेहुणबारे पोलीस स्टेशनमधील अधिकारी व अंमलदारही उपस्थित होते.
पोलीस मुख्यालयातील कवायत निर्देशकांनी यावेळी दंगा नियंत्रणाचे विविध प्रात्यक्षिक दाखवले आणि मार्गदर्शन केले. आगामी काळात येणाऱ्या सणांच्या वेळी कोणत्याही प्रकारची अनुचित घटना टाळण्यासाठी तसेच, कायदा व सुव्यवस्था राखण्यासाठी पोलीस दलाची ही तयारी महत्त्वाची मानली जात आहे.
