जळगाव: धावत्या रेल्वेतून प्रवाशांचे दागिने आणि मौल्यवान ऐवज चोरणाऱ्या सराईत गुन्हेगारांच्या मुसक्या आवळण्यात स्थानिक गुन्हे शाखेला (LCB) यश आले आहे. या कारवाईत एका अट्टल चोरट्याला जेरबंद करण्यात आले असून त्याच्याकडून चोरीचा उलगडा झाला आहे.
नेमकी घटना काय?
दिनांक ८ फेब्रुवारी २०२६ रोजी आनंद मोर्या (रा. अयोध्या) हे झेलम एक्सप्रेसने प्रवास करत होते. जळगाव ते भुसावळ दरम्यान धावत्या रेल्वेतून अज्ञात चोरट्याने त्यांची बॅग लंपास केली होती. या बॅगेत १,६५,०००/- रुपये किमतीचे सोने आणि चांदीचे दागिने होते. याप्रकरणी इटारसी रेल्वे पोलिसात ‘शून्य’ क्रमांकाने गुन्हा दाखल करण्यात आला होता, जो नंतर भुसावळ रेल्वे पोलीस स्टेशनकडे वर्ग करण्यात आला.
तपास आणि अटक:
स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना गुप्त बातमीदाराकडून माहिती मिळाली की, हा गुन्हा जळगावमधील रेकॉर्डवरील गुन्हेगार समीर शेख फिरोज उर्फ गोल्डन आणि सोनु जयसिंग बागडे यांनी केला आहे. या माहितीच्या आधारे पथकाने फातेमा नगर परिसरातून समीर शेख फिरोज उर्फ गोल्डन (वय २१) याला ताब्यात घेतले.
ताब्यात घेतलेला आरोपी: समीर शेख फिरोज उर्फ गोल्डन (रा. फातेमा नगर, जळगाव).
फरार आरोपी: सोनु जयसिंग बागडे (रा. जाखनी नगर, जळगाव) याचा शोध अद्याप सुरू आहे.
पोलीस पथकाची कामगिरी:
समीर शेख याने आपल्या साथीदारासह गुन्हा केल्याची कबुली दिली असून, त्याला पुढील कारवाईसाठी भुसावळ रेल्वे पोलिसांच्या स्वाधीन करण्यात आले आहे. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि वरिष्ठ पोलीस निरीक्षक राहुल गायकवाड यांच्या मार्गदर्शनाखाली पीएसआय शरद बागल, अतुल वंजारी, अकरम शेख, विजय पाटील व पथकाने यशस्वीरीत्या पार पाडली.
