चालकाने अचानक ब्रेक दाबल्याने मागून येणारी बस कंटेनरला धडकली !
चालक वाहकासह नऊ प्रवासी जखमी ; कडजी गावाजवळील घटना
पारोळा प्रतिनिधी ! पारोळा तालुक्यातील कडजी गावाजवळ राष्ट्रीय महामार्ग क्रमांक ५३ वर आज दि. २८ ऑक्टोबर रोजी सायंकाळी साडेसातच्या सुमारास नाशिकहून जळगावकडे येणाऱ्या प्रवासी बसने समोर असलेल्या कंटेनरला मागून जोरदार धडक दिल्याने झालेल्या भीषण अपघातात बसचालक, वाहकासह नऊ प्रवासी जखमी झाले असून त्यापैकी तिघांची प्रकृती गंभीर असल्याचे समजते.
मिळालेल्या माहितीनुसार, बस (क्र. एमएच २० बीएक्स २५७९) ही नाशिकवरून जळगावच्या दिशेने येत असताना कडजी गावाजवळील वळणावर समोर असलेल्या कंटेनरने अचानक ब्रेक मारल्यामुळे आणि त्या वेळी पडत असलेल्या रिपरिप पावसामुळे रस्त्यावरील घसरटपणामुळे बसचालकाला गती नियंत्रणात आणता आली नाही. परिणामी बसने कंटेनरला मागून जोरात धडक दिली. धडकेचा आवाज प्रचंड मोठा असल्याने परिसरातील नागरिक घटनास्थळी धावले.
या अपघातात बसचालक विनोद विक्रम सैंदाणे (४६, रा. जळगाव), वाहक राहुल दिगंबर पाटील (३८, रा. जळगाव) यांच्यासह प्रवासी शेख मोहम्मद इलियास (३२, एरंडोल), शाहिस्ता इलियास शेख (२२, एरंडोल), श्रावण मुरलीधर माळी (४५, पारोळा), शेख असिफ शेख नजीब (३३, कासोदा), शेख हारून रशीद शेख मुनीर (६०, जळगाव), रितेश देवेंद्र भामरे (२८, मेहरगाव ता. धुळे) आणि रूपाली मोतीलाल पाटील (२८, नगाव ता. अमळनेर) हे जखमी झाले आहेत.
अपघाताची माहिती मिळताच रुग्णवाहिका चालक आशुतोष शेलार आणि वसीम शेख यांनी घटनास्थळी तातडीने धाव घेत सर्व जखमींना पारोळा कुटीर रुग्णालयात दाखल केले. तेथे डॉ. गिरीश जोशी, डॉ. महेश पवार, डॉ. सचिन करोडपती, डॉ. चेतन करोडपती, डॉ. पुरुषोत्तम पाटील, डॉ. मिलिंद श्रॉफ तसेच परिचारिका सोनाली गुरव आणि प्रतिमा मुराडी यांनी तत्काळ उपचार सुरू केले. यातील दोन जखमींना पुढील उपचारासाठी जळगाव तर एकाला धुळे येथे हलविण्यात आले आहे, अशी माहिती वैद्यकीय अधिकाऱ्यांनी दिली.
दरम्यान, अपघातामुळे काही काळ महामार्गावरील वाहतूक ठप्प झाली होती. पारोळा पोलीस ठाण्याचे पोलीस निरीक्षक अशोक पवार, उपनिरीक्षक योगेश महाजन, विजय भोंबे, अभिजीत पाटील, प्रवीण पाटील, संतोष महाजन, भूषण पाटील आणि आकाश पाटील यांनी घटनास्थळी पोहोचून वाहतूक सुरळीत केली.
या अपघाताची नोंद रात्री उशिरापर्यंत पारोळा पोलिसांत करण्यात येत होती.
