होमिओपॅथी पदवीधरांच्या नोंदणीविरोधात आयएमएचा १८ सप्टेंबर रोजी एकदिवसीय राज्यव्यापी संप
जळगाव (प्रतिनिधी) : महाराष्ट्र शासनाने घेतलेल्या वादग्रस्त निर्णयाच्या निषेधार्थ इंडियन मेडिकल असोसिएशन (आयएमए) जळगाव शाखेने गुरुवार, दि. १८ सप्टेंबर रोजी एकदिवसीय राज्यव्यापी संप पुकारला आहे. या संपादरम्यान जिल्ह्यातील सर्व खासगी दवाखाने, क्लिनिक्स, ओपीडी आणि रुग्णालये पूर्णपणे बंद राहणार असून आपत्कालीन सेवांचाही समावेश असेल, अशी माहिती आयएमएने दिली आहे.
शासनाने ५ सप्टेंबर २०२५ रोजी काढलेल्या अधिसूचनेनुसार, सर्टिफिकेट कोर्स इन मॉडर्न फार्माकोलॉजी (CCMP) धारक होमिओपॅथी पदवीधरांना महाराष्ट्र मेडिकल कौन्सिल (MMC) मध्ये नोंदणीची परवानगी देण्यात आली आहे. आयएमएने या निर्णयाला ‘मिक्सोपॅथी’ला दिलेले अधिकृत आमंत्रण ठरवले असून याला तीव्र विरोध दर्शवला आहे. त्यांच्या मते, या निर्णयामुळे रुग्णांच्या आरोग्यावर गंभीर परिणाम होऊ शकतात. यापूर्वी ११ जुलै २०२४ रोजी शासनाने अशा नोंदणीस स्पष्ट मनाई केली होती. त्यामुळे घेतलेला हा यू-टर्न धक्कादायक असल्याचे आयएमएचे म्हणणे आहे.
सदर प्रकरण सध्या मुंबई उच्च न्यायालयात न्यायप्रविष्ट आहे. न्यायालयाचा अंतिम निर्णय येण्याआधीच शासनाने घेतलेला निर्णय हा कायदेशीर प्रक्रियेचा अपमान असल्याची भूमिका आयएमएने मांडली आहे.
संपामुळे नागरिकांना होणाऱ्या गैरसोयीबद्दल आयएमएने खेद व्यक्त करताना, हे पाऊल भविष्यात रुग्णांच्या आरोग्याचे रक्षण करण्यासाठी व आधुनिक वैद्यकशास्त्राची अखंडता टिकवण्यासाठी उचलले असल्याचे स्पष्ट केले आहे. तसेच नागरिकांनी या परिस्थितीत सहकार्य करावे, अशी विनंतीही करण्यात आली आहे. संपकाळात वैद्यकीय मदतीची गरज भासल्यास नागरिकांनी जवळच्या शासकीय रुग्णालयाशी किंवा सार्वजनिक आरोग्य केंद्राशी संपर्क साधावा, असे आवाहनही करण्यात आले आहे.
