महा पोलीस न्यूज । चेतन वाणी । भुसावळ शहरातील रेल्वे स्टेशन परिसरातून झालेल्या मोटारसायकल चोरीच्या तपासात भुसावळ बाजारपेठ पोलिसांनी मोठे यश मिळवले आहे. तब्बल १६ मोटारसायकलींची चोरी उघडकीस आणत ८ लाख ३२ हजार रुपये किमतीचा माल हस्तगत करण्यात आला आहे.
पोलिसांनी दिलेल्या माहितीनुसार, फिर्यादी अजहरुद्दीन नियाजुद्दीन शेख (वय ३८, रा. गोसिया नगर, भुसावळ) यांची हिरो कंपनीची HF डिलक्स दुचाकी अज्ञात चोरट्याने चोरून नेली होती. याप्रकरणी २२ ऑगस्ट रोजी गुन्हा दाखल करण्यात आला.
आरोपींचा पर्दाफाश, दुचाकी हस्तगत
तपासादरम्यान तांत्रिक विश्लेषण व गोपनीय माहितीच्या आधारे पोलिसांनी आरोपी काल्या उर्फ विक्रम केसरसिंग बारेला (वय २०, रा. गारग्या, ता. झिरण्या, जि. खरगोण, म.प्र.) यास शाहपुर (जि. बऱ्हाणपूर) येथून ताब्यात घेतले. चौकशीत त्याने साथीदार राहुल रितेश चव्हाण (वय १८, रा. जयभिम मोहल्ला, शाहपुर, जि. बऱ्हाणपूर, म.प्र.) याच्या मदतीने चोरी केल्याची कबुली दिली. या दोन्ही आरोपींकडून चौकशीदरम्यान त्यांनी १६ मोटारसायकली चोरी केल्याचे कबूल केले. पोलिसांनी पंचनाम्याद्वारे त्या जप्त करून सर्व मुद्देमाल हस्तगत केला आहे.
या पथकाने केली कामगिरी
संपूर्ण कामगिरी पोलीस अधीक्षक डॉ.महेश्वर रेड्डी, अपर पोलीस अधिक्षक अशोक नखाते, उपविभागीय पोलीस अधिकारी संदीप गावीत यांच्या मार्गदर्शनाखाली भुसावळ बाजारपेठ पोलीस स्टेशनचे पोलीस निरीक्षक राहुल वाघ यांचे पथकातील हवालदार विजय नेरकर, पोलीस नाईक सोपान पाटील, कर्मचारी योगेश माळी, भुषण चौधरी, प्रशांत सोनार, महेंद्रसींग पाटील, अमर अढाळे, किरण धनगर, रवींद्र भावसार, सचीन चौधरी, जावेद शहा, हर्षल महाजन, योगेश महाजन अशांनी केली आहे.
