जळगाव : जळगाव शहरातील सुभाष चौकातील नामांकित ‘रतनलाल सी. बाफना ज्वेलर्स’मध्ये ग्राहकाच्या बहाण्याने येऊन सोन्याची चेन चोरणाऱ्या सराईत गुन्हेगाराला स्थानिक गुन्हे शाखेने (LCB) बेड्या ठोकल्या आहेत. तेलंगणा राज्यातील सायबरबाद परिसरातून या आरोपीला अटक करण्यात आली असून, त्याने वितळवून बनवलेली सोन्याची लगडदेखील पोलिसांनी हस्तगत केली आहे.
नेमकी घटना काय?
९ जानेवारी २०२६ रोजी एका अज्ञात व्यक्तीने बाफना ज्वेलर्समध्ये सोने खरेदीचा बहाणा करून प्रवेश केला होता. सेल्समनला बोलण्यात गुंतवून त्याने १९.३५० ग्रॅम वजनाची (किंमत सुमारे २,४९,६१५ रुपये) सोन्याची चेन लंपास केली होती. याप्रकरणी शनिपेठ पोलीस ठाण्यात गुन्हा दाखल करण्यात आला होता.
असा लागला छडा
पोलीस अधीक्षक महेश्वर रेड्डी यांच्या मार्गदर्शनाखाली स्थानिक गुन्हे शाखेने तांत्रिक विश्लेषण आणि सीसीटीव्ही फुटेजच्या आधारे तपास सुरू केला. तपासादरम्यान संशयित आरोपी तेलंगणात असल्याची माहिती मिळाली. त्यानुसार पथकाने तिथे जाऊन भास्कर किसन बानोथ (वय २२, रा. नगाई पल्ली तांडा, जि. यदाद्री भुवनागिरी, तेलंगणा) याला ताब्यात घेतले.
ओळख लपवण्यासाठी चेन वितळवली
पकडले जाऊ नये आणि चोरीचे सोने सहज विकता यावे, यासाठी आरोपीने चोरी केलेली सोनसाखळी वितळवून त्याची ‘लगड’ (Gold Ingot) तयार केली होती. पोलिसांनी त्याच्याकडून ही सोन्याची लगड जप्त केली असून चोरीचा १०० टक्के मुद्देमाल हस्तगत करण्यात पोलिसांना यश आले आहे.
कारवाई करणारे पथक
ही यशस्वी कामगिरी एलसीबीचे वरिष्ठ पोलीस निरीक्षक राहुल गायकवाड, पोलीस उपनिरीक्षक जितेंद्र वल्टे, प्रवीण भालेराव, मुरलीधर धनगर, सिद्धेश्वर डापकर आणि महेश सोमवंशी यांच्या पथकाने केली. आरोपीला पुढील कारवाईसाठी शनिपेठ पोलिसांच्या ताब्यात देण्यात आले आहे.
