महा पोलीस न्यूज । १५ मे २०२५ । जळगाव शहरातील दूध फेडरेशन रोडवर मध्यरात्री २ वाजेच्या सुमारास एका चारचाकी वाहनात गोळीबाराची धक्कादायक घटना घडली. या घटनेत २५ वर्षीय नाजीम फिरोज पटेल या तरुणाच्या पाठीत उजव्या बाजूस गोळी लागल्याने तो गंभीर जखमी झाला आहे. याप्रकरणी जळगाव शहर पोलिस ठाण्यात गुन्हा दाखल करण्यात आला असून, संशयिताविरोधात तपास सुरू आहे.
पोलिसांनी दिलेल्या माहितीनुसार, नाजीम पटेल हा धरणगाव तालुक्यातील पाळधी येथील रहिवासी असून, तो शेफ म्हणून काम करतो. दि.१४ मे रोजी रात्री १० वाजेच्या सुमारास नाजीम आपला मामा बबलू पटेल आणि मित्र तोहित देशपांडे, अल्ताफ शेख यांच्यासह चारचाकी वाहन क्रमांक एमएच.१९.क्यू.७५१४ ने भुसावळ येथील एका कार्यक्रमासाठी गेला होता. रात्री ११ वाजता कार्यक्रम आटोपल्यानंतर ते पाळधीला परतत निघाले होते.
मित्रानेच केला गोळीबार
छत्रपती शिवाजी महाराज नगर ते दूध फेडरेशन रस्त्याने पाळधीकडे जाण्यासाठी ते निघाले होते. वाहन बबलू पटेल चालवत होते, तर नाजीम त्यांच्या शेजारी बसले होते. मध्यरात्री २ वाजेच्या सुमारास अचानक गोळीबाराचा आवाज आला आणि नाजीम यांच्या पाठीत गोळी घुसली. आवाजामुळे गाडी थांबवून मागे पाहिले असता तोहीत देशपांडे हा हातात बंदूक घेऊन खेळत असल्याचे दिसले.
शहर पोलिसात गुन्हा दाखल
या घटनेनंतर नाजीम यांना तातडीने जळगाव येथील जिल्हा रुग्णालयात दाखल करण्यात आले, जिथे त्यांच्यावर उपचार सुरू आहेत. घटनेची माहिती मिळताच जळगाव शहर पोलिस ठाण्याचे कर्मचारी घटनास्थळी दाखल झाले. रात्री उशिरा संशयिताविरोधात गुन्हा नोंदवण्यात आला आहे. सहाय्यक पोलिस निरीक्षक राम शिखरे या प्रकरणाचा तपास करत आहेत. या घटनेमुळे परिसरात खळबळ उडाली आहे.
