महा पोलीस न्यूज । चेतन वाणी । उत्तर प्रदेशातील सुल्तानपूर जिल्ह्यात अयोध्या-प्रयागराज महामार्गावर शनिवारी पहाटे ४ वाजता एक भीषण अपघात झाला. अयोध्या येथून रामलला दर्शन घेऊन परत येत असलेल्या भाविकांच्या टूरिस्ट बसला वेगवान ट्रेलरने जोरदार धडक दिली. या अपघातात एका महिला भाविकाचा मृत्यू झाला असून, १५ जण जखमी झाले आहेत.
मिळालेल्या माहितीनुसार, बसमध्ये सुमारे ४० भाविक होते. हे सर्व महाराष्ट्रातील जळगाव जिल्ह्यातील धरणगाव तालुक्यातील कल्याणेहोळ येथील रहिवासी असल्याचे समजते. अयोध्या येथे भगवान रामलला दर्शन घेऊन प्रयागराज दर्शनासाठी जात होते. कूरेभार चौकात पोहोचताच एक अनियंत्रित ट्रेलरने बसला समोरून जोरदार धडक दिली. धडक इतकी भयानक होती की बस आणि ट्रेलर दोन्ही उलटले. अपघातानंतर घटनास्थळी मोठा गोंधळ उडाला.
स्थानिक नागरिक आणि प्रवासी तातडीने मदतीसाठी धावले आणि उलटलेल्या बसमध्ये अडकलेल्या प्रवाशांना बाहेर काढण्यास सुरुवात केली. सुमारे १५ भाविकांना गंभीर जखमा झाल्या आहेत. जखमींना अॅम्ब्युलन्सच्या मदतीने तातडीने कूरेभार सामुदायिक आरोग्य केंद्रात नेण्यात आले. तेथे डॉ.प्रयेश दीक्षित आणि त्यांच्या टीमने सर्व जखमींच्या उपचाराची सुरुवात केली. उपचारादरम्यान पिंप्राळा परिसरातील सध्या पुणे येथे राहणाऱ्या वर्षा किरण पाटील (४५) या महिलेचा मृत्यू झाला.
अपघाताची माहिती मिळताच कूरेभार पोलिस टीम घटनास्थळी पोहोचली. पोलिसांनी महामार्गावर उलटलेली बस आणि ट्रेलर काढण्यासाठी क्रेन बोलावली आणि बचावकार्य सुरू केले. पोलिस सध्या घटनेच्या कारणांची तपासणी करत आहेत प्रशासनाने जखमींना शक्य तितकी मदत देण्याचे आश्वासन दिले आहे.
जखमींमध्ये कोकिला बाई (६८ वर्ष), जरगा बाई (६७ वर्ष), योजना बाई (५४ वर्ष), मंजू बाई (४० वर्ष), रतना बाई (५४ वर्ष), राजू (३५ वर्ष), अनिता (४० वर्ष), पोडम सिंह (५४ वर्ष), सरिता बाई (५५ वर्ष) आणि आशा बाई (६५ वर्ष) यांचा समावेश आहे. डॉक्टरांनी कोकिला, संगीता, अनिता, अर्चना आणि रतना यांना उत्तम उपचारासाठी राजकीय मेडिकल कॉलेजला रेफर केले आहे. इतर पाच जणांना किरकोळ जखमा झाल्या आहेत.
