महा पोलीस न्यूज । निलेश पाटील । कजगाव (ता. भडगाव) येथून चाळीसगाव येथे शिक्षणासाठी जाणाऱ्या शालेय विद्यार्थ्यांना आणि वृद्ध नागरिकांना महाराष्ट्र राज्य मार्ग परिवहन महामंडळाच्या (एसटी) चालक आणि वाहकांकडून सातत्याने त्रास सहन करावा लागत आहे. शालेय विद्यार्थ्यांना पास नाकारून “गाडीत बसू नका” असे उद्धटपणे सांगितले जाते, तर वृद्धांना दमदाटी आणि अपमानास्पद वागणूक दिली जाते. यामुळे कजगाव परिसरातील नागरिकांमध्ये तीव्र नाराजी पसरली आहे.
विद्यार्थ्यांना आणि वृद्धांना त्रास
कजगाव परिसरातील अनेक विद्यार्थी शिक्षणासाठी चाळीसगावला दररोज प्रवास करतात. मात्र, एसटी चालक आणि वाहकांकडून त्यांचे वैध पास नाकारले जातात आणि त्यांना गाडीत प्रवेश नाकारला जातो. यामुळे विद्यार्थ्यांना मानसिक त्रास सहन करावा लागत असून, त्यांच्या शैक्षणिक प्रगतीवर परिणाम होत आहे. विशेषतः विद्यार्थिनींना उद्धटपणे बोलले जाते, ज्यामुळे त्यांच्यामध्ये भीती आणि असुरक्षिततेची भावना निर्माण होते. त्याचप्रमाणे, वृद्ध नागरिकांनाही अयोग्य वागणूक दिली जाते. त्यांना बस मध्ये प्रवेश नाकारला जातो किंवा दमदाटी केली जाते, ज्यामुळे त्यांच्यासाठी प्रवास हा त्रासदायक ठरतो. वेळेवर गंतव्यस्थानी पोहोचणे त्यांच्यासाठी अत्यंत आवश्यक असते, परंतु चालक आणि वाहकांच्या मनमानीमुळे त्यांना अडचणींचा सामना करावा लागतो.
कजगाव बस स्टँडवरील ट्रॅफिक जामची समस्या
कजगाव बस स्टँड येथे एसटी बसेस मध्यभागी थांबवल्या जातात, ज्यामुळे सतत ट्रॅफिक जामची समस्या उद्भवते. यामुळे मागून येणाऱ्या वाहनांना अडथळा निर्माण होतो आणि आपत्कालीन रुग्णवाहिकांना जाण्यासाठी जागा मिळत नाही. ही समस्या स्थानिक नागरिकांसाठी गंभीर बनली आहे, कारण यामुळे दैनंदिन प्रवासात अडथळे निर्माण होतात.
वारंवार होणारे वाद
कजगाव बस स्टँड येथे विद्यार्थी, वृद्ध आणि चालक-वाहकांमधील वाद वारंवार घडतात. अनेकदा स्थानिक नागरिकांना मध्यस्थी करून हे वाद मिटवावे लागतात. चालक आणि वाहकांकडून प्रवाशांना योग्य वागणूक दिली जात नसल्याने नागरिकांमध्ये असंतोष वाढत आहे. विशेषतः शालेय विद्यार्थ्यांना आणि वृद्धांना या त्रासाचा सर्वाधिक फटका बसत आहे.
नागरिकांची मागणी
कजगाव परिसरातील नागरिक आणि शालेय विद्यार्थ्यांनी या मनमानी कारभारावर तात्काळ कारवाई करण्याची मागणी केली आहे. वरिष्ठ अधिकाऱ्यांनी याकडे लक्ष देऊन चालक आणि वाहकांच्या वर्तनावर नियंत्रण ठेवावे, तसेच विद्यार्थ्यांच पास आणि वृद्धांच्या प्रवास सुविधांचे नियम पाळले जावेत, अशी मागणी होत आहे. यामुळे विद्यार्थ्यांचे शैक्षणिक नुकसान आणि मानसिक त्रास टाळता येईल. तसेच, बस स्टँडवरील ट्रॅफिक जामची समस्या सोडवण्यासाठी योग्य उपाययोजना करण्यात याव्यात, असे आवाहन नागरिकांनी केले आहे.
वरिष्ठ अधिकाऱ्यांकडे कारवाईची मागणी
एसटी महामंडळाच्या चालक आणि वाहकांच्या या मनमानी कारभारामुळे कजगाव परिसरातील नागरिक त्रस्त झाले आहेत. वरिष्ठ अधिकाऱ्यांनी याकडे त्वरित लक्ष देऊन हा प्रश्न मार्गी लावावा, अशी मागणी स्थानिक नागरिक आणि विद्यार्थ्यांकडून होत आहे. यामुळे कजगाव ते चाळीसगाव या मार्गावरील प्रवास सुखकर आणि सुरक्षित होईल, असा विश्वास व्यक्त केला जात आहे.
