महा पोलीस न्यूज । भूषण शेटे । चाळीसगाव शहर वाहतूक शाखेच्या वतीने आज वाहनधारकांची एक महत्त्वपूर्ण बैठक आयोजित करण्यात आली होती. या बैठकीत शालेय विद्यार्थ्यांची वाहतूक करताना घ्यावयाची काळजी आणि मोटार वाहन कायद्याचे पालन करण्याबाबत वाहन चालकांना मार्गदर्शन करण्यात आले. याप्रसंगी शहर वाहतूक शाखेचे प्रभारी श्री. प्रदीप एकशिंगे यांनी चालकांना कायद्याचे पालन आणि सुरक्षित वाहतुकीसाठी महत्त्वाच्या सूचना दिल्या.
बैठकीत एकता विद्यार्थी वाहतूक संघ, चाळीसगावच्या वतीने विशेष उपक्रम राबवण्यात आला. अलीकडेच आजारपणामुळे निधन झालेल्या दोन वाहन चालक, कै. राजेंद्र अहिरे पातोंडेकर आणि कै. केशव औरंगे यांच्या कुटुंबीयांना आर्थिक मदत म्हणून प्रत्येकी २१ हजार रुपयांचा धनादेश प्रदान करण्यात आला. ही मदत शहर वाहतूक शाखेचे प्रभारी श्री. प्रदीप एकशिंगे, एकता ग्रुपचे ज्येष्ठ चालक श्री. मनोज देशमुख आणि श्री. गोरख गोत्रे यांच्या हस्ते सुपूर्द करण्यात आली.
या कार्यक्रमात एकता विद्यार्थी वाहतूक संघाचे संपूर्ण कारभार सांभाळणारे वाहन चालक श्री. धारासिंग चव्हाण यांनी उपस्थित मान्यवरांचे आभार मानून आपले मनोगत व्यक्त केले. यावेळी शहर वाहतूक शाखेचे मेजर रावसाहेब थोरात तसेच एकता ग्रुपचे वाहन चालक राजेंद्र शेटे, बापू गोत्रे, योगेश देशमुख, आप्पा औरंगे, संजय कुलकर्णी, भागवत चौधरी, शरद पाटील, शिवाजी जगताप, सुभाष महाजन, प्रवीण देवरे, ज्ञानेश्वर पाटील यांच्यासह अनेक चालक उपस्थित होते.
या बैठकीमुळे वाहन चालकांमध्ये सुरक्षित वाहतुकीबाबत जागरूकता निर्माण होण्यासह एकता आणि सामाजिक बांधिलकीचे दर्शन घडले.
