‘डायल ११२’ला लेट रिस्पॉन्स, चार पोलीस अधिकारी ‘कंट्रोल जमा’

महा पोलीस न्यूज | २३ फेब्रुवारी २०२४ | पोलीस प्रशासनाव्दारे तात्काळ मदतीसाठी ‘डायल ११२’ ही योजना सुरू केली आहे. एकीकडे जळगावात ‘डायल ११२’मुळे आत्महत्या करणाऱ्या तरुणाचा जीव वाचल्याचे ताजे उदाहरण असताना धुळे जिल्ह्यात मात्र या उलट प्रकार झाल्याचे निदर्शनास आले आहे. ‘डायल ११२’ सेवेला वेळेत प्रतिसाद न देता कर्तव्यात कसूर केली म्हणून गुरुवारी येथील चार पोलिस ठाण्यांच्या प्रभारींना ‘कंट्रोल जमा’ करण्यात आले. तर, तीन कर्मचाऱ्यांचे निलंबन करण्यात आले आहे.

‘डायल ११२’ सेवेला वेळेत प्रतिसाद न देता कर्तव्यात कसूर केली म्हणून पोलीस अधीक्षक श्रीकांत धिवरे यांनी शहर पोलिस ठाण्याचे पोलिस निरीक्षक धीरज महाजन, तालुका पोलिस ठाण्याचे पोलिस निरीक्षक प्रमोद पाटील, दोंडाईचा पोलिस ठाण्याचे सहायक पोलिस निरीक्षक नीलेश मोरे आणि निजामपूर पोलिस ठाण्याचे एच.एल.गायकवाड यांच्याकडे प्रत्येकी चार तासांसाठी नियंत्रण कक्षातील स्टेशन डायरीचा चार्ज सोपवला आहे. तर शहर पोलिस ठाण्याचे हिमांशू ठाकूर आणि निजामपूर पोलिस ठाण्याचे कृष्णा भील व सुनील अहिरे यांना थेट निलंबित करण्यात आले आहे

११२ क्रमांकावर कॉल आल्यानंतर शहर पोलिस ठाण्याच्या मार्शलने ४५ मिनिटांनी, तर निजामपूर पोलिस ठाण्याच्या मार्शलने १ तास ४५ मिनिटांनी प्रतिसाद दिला होता. निजामपूर येथील मार्शल विनाअर्ज सुटीवर होता त्यांच्याऐवजी ज्याच्यावर जबाबदारी होती त्यानेही कमालीचा विलंब लावला. याची गंभीर दखल जिल्हा पोलीस दलाकडून घेण्यात आली आहे. जळगावात मात्र गेल्या काही महिन्यात उलट परिस्थिती पहावयास मिळाली आहे. मेहरूण तलाव येथे दोन-तीन वेळा आत्महत्या करणाऱ्यांचा जीव वाचविण्यात आला होता तर दोन दिवसापूर्वी शहर पोलिसांनी एका तरुणाचा जीव वाचवला होता.