अमळनेर PTA क्लासेस संघटनेने 30 गरजू विद्यार्थ्यांना घेतले दत्तक
अमळनेर (पंकज शेटे) : अमळनेर तालुक्यातील 30 गरजू, होतकरू आणि अत्यंत दुर्बल पार्श्वभूमीतील विद्यार्थ्यांना अमळनेर PTA क्लासेस संघटनेने यंदाही शैक्षणिक दत्तक घेतले असून, या विद्यार्थ्यांना वर्षभर मोफत क्लासेस, पुस्तके, वह्या व शैक्षणिक साहित्य दिले जाणार आहे.
या उपक्रमाची अधिकृत घोषणा उपविभागीय अधिकारी मा. नितीन मुंडावरे यांच्या कार्यालयात PTA अध्यक्ष भैय्यासाहेब मगर सर यांनी केली.
पित्याचे छत्र हरवलेले अनाथ, दोन वेळच्या जेवणासाठी संघर्ष करणारे विद्यार्थी या योजनेत समाविष्ट असून, त्यांचा शिक्षणाचा दिवा विझू नये यासाठी PTA च्या समर्पित शिक्षकांनी ही सामाजिक जबाबदारी उचलली आहे.
दरवर्षी संघटनेकडून सुमारे 400 हून अधिक विद्यार्थ्यांना फीमध्ये सवलत देण्यात येते. यावर्षी दत्तक उपक्रमासोबतच ही मदतही सुरू आहे.
मा. नितीन मुंडावरे साहेबांनी या समाजोपयोगी उपक्रमाचे कौतुक करत भविष्यात अशा संस्था आणि संघटनांना शासनस्तरावरून प्रोत्साहन मिळावे, अशी अपेक्षा व्यक्त केली.
कार्यक्रमास PTA चे प्रमुख सदस्य — भैय्यासाहेब मगर, किरण माळी, राकेश बडगुजर, सुरश्री वैद्य, सुधीर टाकणे, सोनल जोशी, वैशाली निकम, शिरीष डहाळे, शेखर कुलकर्णी, हर्षल बडगुजर, आरिफ पिंजारी, ज्ञानेश्वर मराठे, स्वर्णदीप राजपूत आणि इतर शिक्षक उपस्थित होते.
PTA क्लासेस संघटनेने पुन्हा एकदा दाखवून दिले की, शिक्षण म्हणजे केवळ व्यवसाय नाही तर समाजसेवेची पवित्र प्रक्रिया आहे.
