राष्ट्रीय चर्मकार महासंघाच्या वर्धापन दिनानिमित्त अमळनेर ग्रामीण रुग्णालयात रुग्णांना फळवाटप
अमळनेर: राष्ट्रीय चर्मकार महासंघाच्या वर्धापन दिनाचे औचित्य साधून अमळनेर शहर व तालुका राष्ट्रीय चर्मकार महासंघाच्या वतीने सामाजिक बांधिलकी जपत अमळनेर येथील ग्रामीण रुग्णालयात दाखल असलेल्या रुग्णांना फळवाटप करण्यात आले.
वर्धापन दिन केवळ औपचारिकरीत्या साजरा न करता, रुग्णांच्या चेहऱ्यावर आनंद निर्माण व्हावा आणि त्यांना आरोग्यदायी लाभ मिळावा या उद्देशाने महासंघाने हा सामाजिक उपक्रम राबवला. या कार्यक्रमादरम्यान रुग्णालयातील विविध कक्षांमध्ये जाऊन तेथील रुग्णांची आस्थेने चौकशी करण्यात आली व त्यांना फळांचे वाटप करण्यात आले. महासंघाच्या या उपक्रमाचे रुग्ण तसेच त्यांच्या नातेवाईकांनी मनापासून आभार मानले.
या प्रसंगी राष्ट्रीय चर्मकार महासंघ अमळनेर शहर व तालुक्याचे विविध पदाधिकारी, कार्यकर्ते आणि समाजबांधव मोठ्या संख्येने उपस्थित होते. महासंघाच्या या स्तुत्य उपक्रमाचे अमळनेर शहरात व परिसरात कौतुक होत आहे.
