जळगाव ,साक्री येथील वाहन चोरी प्रकरणात दोन जणांना ठोकल्या बेड्या !
दोन चोरीच्या मोटारसायकली जप्त ; शहर पोलीस स्टेशनच्या गुन्हे शोध पथकाची कामगिरी
जळगाव,प्रतिनिधी I जळगाव शहर पोलीस स्टेशनच्या गुन्हे शोध पथकाने मोठी कारवाई करत दोन अट्टल वाहन चोरट्यांना अटक केली आहे. या कारवाईमुळे जळगाव शहरातील एक आणि धुळे जिल्ह्यातील साक्री पोलीस स्टेशन हद्दीतील एक अशा दोन वाहन चोरीच्या गुन्ह्यांची उकल झाली आहे. पोलिसांनी चोरीला गेलेली होंडा ॲक्टिव्हा आणि हिरो होंडा फॅशन प्रो मोटारसायकल जप्त केली आहे
जळगाव शहरातील हमाल वाडा, शिवाजी नगर येथे राहणारे उदयकुमार सुभाष कोचुरे यांची ३०,००० रुपये किमतीची होंडा ॲक्टिव्हा मोपेड २४ ऑगस्ट २०२५ रोजी रात्री चोरीला गेली होती. याप्रकरणी जळगाव शहर पोलीस स्टेशनमध्ये गुन्हा दाखल करण्यात आला होता. या गुन्ह्याचा तपास करण्यासाठी पोलीस निरीक्षक सागर शिंपी यांनी दोन पथके तयार केली. गुप्त माहितीच्या आधारे पथकाने इरफान खान उस्मान खान पठाण (वय २१, मूळ रा. साक्री, जि. धुळे, सध्या रा. गेंदालाल मिल, जळगाव) याला ताब्यात घेतले.
इरफान पठाणची कसून चौकशी केली असता, त्याने आपला मित्र अदिल शेख उर्फ नाट्या माजिद शेख (वय १९, रा. गेंदालाल मिल, जळगाव) याच्या साथीने जळगावातील होंडा ॲक्टिव्हा चोरी केल्याची कबुली दिली. पोलिसांनी चोरीला गेलेली मोपेड जप्त केली आणि दोघांनाही अटक केली. पुढील चौकशीत इरफान पठाणने नोव्हेंबर २०२४ मध्ये साक्री (जि. धुळे) येथून हिरो होंडा फॅशन प्रो मोटारसायकल चोरी केल्याचे कबूल केले. साक्री पोलीस स्टेशनमध्ये या चोरीचा गुन्हा दाखल होता. पोलिसांनी ती मोटारसायकलही जप्त केली आहे.
ही यशस्वी कारवाई जळगावचे पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे आणि पोलीस निरीक्षक सागर शिंपी यांच्या मार्गदर्शनाखाली पार पडली. जळगाव शहर पोलीस स्टेशनच्या गुन्हे शोध पथकातील सहायक फौजदार सुनील पाटील, पोलीस हवालदार उमेश भांडारकर, सतीश पाटील, योगेश पाटील, नंदलाल पाटील, विरेंद्र शिंदे, दीपक शिरसाठ, भगवान पाटील, पोलीस नाईक सुधीर साळवे, पोलीस कॉन्स्टेबल अमोल ठाकूर, भगवान मोरे, प्रणय पवार आणि राहुलकुमार पांचाळ यांनी या कारवाईत महत्त्वाची भूमिका बजावली.
